Молиявий пирамида ташкилотига асос солгани учун 150 йилга қамалган Берни Мейдофф бир ярим йил умри қолганини айтиб, ўзини озодликка чиқаришларини сўрамоқда. Бу ҳақда The New York Times хабар қилган.
Нашрнинг қайд этишича, Мейдофф тарихдаги энг катта молиявий пирамидалардан бирини яратган.
Собиқ молиячи сурункали буйрак етишмовчилиги касаллигига чалинган, ушбу маълумотни унинг адвокати тақдим этган. Оқловчининг сўзларига кўра, касаллик охирги босқичга яқинлашиб қолган. Мейдофф жазо тариқасида белгиланган муддатнинг 10 йилини қамоқда ўтказди.
«Мейдофф ўз жиноятларининг жиддийлиги борасида баҳслашмоқчи ҳамда ўзи зарар етказган инсонларнинг ҳис-туйғуларини ерга урмоқчи эмас, бироқ у суддан оз миқдорда бўлса ҳам ўзига нисбатан меҳрибонроқ ва шафқатлироқ бўлишни сўрамоқда», — дея адвокат сўзларини келтирган газета.
Мейдофф 81 ёшда, у 2019 йил июль ойида паллиатив ёрдам кўрсатиш бўлимига ўтказилган. Буйрак касалликларидан ташқари маҳкум юрак-қон томир хасталиклари, хусусан, гипертониядан ҳам азият чекади.
Изоҳ (0)