Россия президенти маъмурияти Владимир Путин иштирокидаги оммавий тадбирларга келган ҳар бир кишининг тана ҳароратини ўлчашни бошлади. Тана ҳароратини тепловизор билан қуролланган киши ўлчамоқда. Бу ҳақда Meduza хабар берди.
Путиннинг матбуот котиби Дмитрий Песковнинг маълум қилишича, Кремлда янги коронавирус инфекциясининг тарқалишига қарши кураш бўйича қўшимча чоралар жорий қилинган.
Коронавирусга қарши кураш бўйича тезкор штабга раҳбарлик қилаётган бош вазир ўринбосари Татьяна Голикованинг сўзларига кўра, Кремлдаги текширувлар коронавирус сабабли эмас, балки маҳаллий мавсумий грипп сабабли олиб борилмоқда.
Бир қатор давлатлар қаторида Россия ҳам ўз фуқароларини Хитойдан эвакуация қилди. Путин эса вирусга қарши препаратлар ва ниқоблар нархини оширган дорихоналардан лицензиясини олиб қўйишни таклиф қилди. Коронавирус Россияда саримсоқ тақчиллигига сабаб бўлиши мумкинлиги маълум қилинди.
Изоҳ (0)