Япониядаги саёҳат кемасида 10 кишида коронавируси келтириб чиқарган пневмония касаллиги аниқланди. Расмийларнинг қарорига асосан, бортида тўрт мингга яқин киши бўлган кема икки ҳафта муддатга Йокогама қирғоқ акваториясида карантинга олинган. Бу ҳақда The Washington Post хабар берди.
Хабар берилишича, Diamond Princess саёҳат кемаси жорий йилнинг 20 январь куни Йокогамадан чиқиб, Кагосима—Гонконг—Окинава йўналишидан ўтиб, 3 февраль, душанба куни, қайтиб келган. Бу вақтга келиб кемадаги бир неча киши тоби қочгани ҳақида хабар қилган ва ҳукумат бортдаги барчани текширувдан ўтказишга қарор қилган.
Япония Соғлиқни сақлаш, меҳнат ва фаровонлик вазирлиги 5 февраль, чоршанба куни, шифокорлар 10 кишида янги коронавирус сабаб бўлган пневмонияни аниқлаганини маълум қилди. Қайд этилишича, вирус гонконглик йўловчи томонидан юқтирилган бўлиши мумкин.
Саёҳатчиларни ташувчи компаниянинг хабар беришича, Японияга самолётда учиб келган 80 ёшли эркак 20—25 январь кунлари Diamond Princess бортида бўлган. Гонконгда мазкур йўловчидан коронавирус топилган.
Ҳукумат вакиллари томонидан хабар берилишича, вирус ташхиси қўйилган кемадаги барча йўловчилар Канагава префектурасидаги касалхонага ётқизилган.
Кема оператори томонидан хабар берилишича, уч нафар япониялик, Хитойнинг уч нафар фуқароси, икки нафар австралиялик ва АҚШнинг бир нафар фуқароси, шунингдек, филиппинлик экипаж аъзоси тасдиқланган ташхис билан касалхонага ётқизилган.
Япониянинг NHK телеканали хабарига кўра, тўрт кишининг ёши 50 дан 60 ёшгача, яна тўрт нафари 60 ёшдан 70 ёшгача, бири киши 70 ёшдан, бошқаси 80 ёшдан ошган. Уларнинг ҳеч бирининг аҳволи оғир эмаслиги таъкидланган.
Kruiz компаниясининг маълумотларига кўра, кема бортида жами 2666 нафар йўловчи ва экипажнинг 1045 нафар аъзоси бўлган. Уларнинг қарийб ярми Япония фуқаролари, шунингдек, лайнерда жами 56 мамлакат фуқароси бўлган.
Маълумот учун, Хитойда янги турдаги 2019-nCoV коронавируси билан касалланганлар сони 24,3 мингга етди. Касаллик оқибатида вафот этганлар эса 490 кишини ташкил этмоқда. Жаҳон соғлиқни сақлаш ташкилотининг маълум қилишича, янги турдаги коронавируснинг тарқалишига қарши курашиш учун яқин уч ойда 61,5 миллион доллар керак бўлади. Хитойлик вирусологлар атипик пневмонияга қарши вакцина 2019-nCoV коронавирусини тўхтатиши мумкинлигини айтди.
Ўзбекистон 4 февраль, сешанба куни, Хитойдан 250 нафар фуқаросини эвакуация қилди. Уларда коронавирус аниқланмади. 5 февраль куни мураккаб эпидемик вазият ҳукм сураётган Ухань шаҳридан яна 84 нафар Ўзбекистон фуқароси олиб келинди.
Изоҳ (0)