Si Szinpin JSSTga koronavirusni yengishga va’da berdi
Xitoy prezidenti Si Szinpin mamlakatda tarqalgan yangi turdagi koronavirusni yengish mumkinligiga ishonmoqda. U bu haqda Jahon sog‘liqni saqlash tashkiloti bosh direktori Tedros Adanom Gebreyesusga ma’lum qildi. Kasallik avj olganligi munosabati bilan JSST rahbari ayni paytda Xitoyda tashrif bilan bo‘lib turibdi. Bu haqda “Kommersant” xabar berdi.
“Men bunga ishonaman, biz virusni, albatta, yengamiz. Faqatgina ishonish kerak, chunki biz bir qayiqda bo‘lganimiz uchun ilmiy usullarni va aniq samarali choralarni qo‘llaymiz ”, — deb aytib o‘tgan Si Szinpin. Shuningdek, XXR raisi epidemiya bilan bog‘liq vaziyatni shaxsan o‘zi kuzatib borayotganini ta’kidlagan.
Bir necha kun oldin Si Szinpin Pekinda Xitoy kommunistik partiyasi Siyosiy byurosi doimiy qo‘mitasining yig‘ilishini o‘tkazgan va unda epidemiyaga qarshi kurashish uchun maxsus guruh tuzishga qaror qilingan. Xitoy rasmiylarining o‘zi ahvolni “o‘ta jiddiy” deb baholagan. Shuningdek, kasallangan kishilarni davolash maqsadida kasalxonalar qurish uchun davlat budjetidan 43,2 million dollar ajratiladi.
Avvalroq JSST mazkur epidemiya yuqori darajada xavfli ekanligini ma’lum qilgan edi.
Xitoydagi koronavirus epidemiyasidan vafot etganlar soni 106 kishiga yetdi, yana salkam 1300 ta yangi kasallanish holatlari tasdiqlandi. Xitoyda koronavirusni davolash 1-2 hafta vaqt olishi ma’lum qilindi.
Ma’lumot uchun, Xubeydagi Uxan shahri koronavirus o‘chog‘i hisoblanadi. Bundan tashqari, yana o‘ndan ortiq mamlakatda, xususan, Germaniyada ham xuddi shu virus bilan kasallanish holatlari aniqlangan.
Epidemiya sabab Xitoydagi umumiy aholisi 57 million kishiga teng 15 ta shahar to‘liq yoki qisman yopilgan. Xitoy rahbari Si Szinpin vaziyatni murakkab deb atagan.
AQSh va Yaponiya Uxandan o‘z fuqarolarini olib chiqib ketishni rejalashtirayotgani ma’lum qilindi. O‘zbekiston Tashqi ishlar vazirligi esa Xitoy hozirda chet el fuqarolarini Uxandan evakuatsiya qilish masalasini ko‘rib chiqmayotgani haqida xabar berdi.
