Хитой коммунистик партияси марказий қўмитасининг сиёсий-ҳуқуқий комиссияси 21 январь, сешанба куни амалдорларни Хитойда коронавирус тарқалиши ҳақида маълумотни яшириш хавфи ҳақида огоҳлантирди. Бу ҳақда «ТАСС» хабар бермоқда.
«Янги вирус тарқалиши ҳақидаги маълумотни ўз манфаати йўлида қасддан яширган ёки бу ҳақда ўз вақтида хабар бермаган шахслар бир умрга шарманда бўлади. Ўз сиёсий мавқеини фуқаролари манфаатидан устун қўйган ҳар қандай киши партия ва халқ олдида энг катта жиноятчи ҳисобланади», — дейилади комиссиянинг расмий саҳифасида эълон қилинган баёнотда.
Комиссия жамиятда коронавируснинг тарқалиши ҳақида ваҳима пайдо бўлишининг олдини олиш мақсадида очиқ маълумот беришга чақирди. «Одамлар вакуумда яшамайди, агар биз касаллик ҳақидаги ҳақиқатни яширсак, миш-мишлар пайдо бўлишига шароит яратиб берамиз холос», — деб таъкидланган баёнотда.
Аввалроқ Хитойда янги вирусдан тўртинчи киши вафот этгани, Жаҳон соғлиқни сақлаш ташкилоти шошилинч йиғилиш чақиргани ҳақида хабар берилган эди.
Изоҳ (0)