Хитой 2020 йил охирига келиб мамлакатдаги йирик шаҳарларда, 2022 йилда эса барча шаҳар ва аҳоли масканларида пластик пакетлардан фойдаланишни тақиқлайди, деб хабар бермоқда Meduza.
Маълум бўлишича, Хитой расмийлари пластик ишлаб чиқарилиши, савдоси ва фойдаланиш бўйича янги дастурни ишлаб чиқди. Хитойнинг турли қисмларида ва пластикнинг турларига кўра тақиқ кучга кириши бўйича турлича муддат белгиланган.
Масалан, 2020 йил охирига келиб пластик найчалардан фойдаланиш бутун мамлакат бўйлаб, ресторанлардаги пластик буюмлар эса фақат йирик шаҳарлардагина тақиқланади. Бир марталик идишларда етказиб бериш савдоси ҳам 2025 йилга келиб тўхтатилади.
2020 йил охирига келиб йирик шаҳарлардаги аксарият дўконларда бир марталик юпқа пакетлардан фойдаланиш ноқонуний деб топилади, кичик шаҳарларда эса 2022 йилгача фойдаланилади. Шунингдек, 2025 йилга келиб меҳмонхоналар бир марталик пластик буюмлар тақдим этишни, почта эса жўнатмаларни пластик қадоқларга ўрашни тўхтатади.
Science журналининг 2015 йилги тадқиқотига кўра дунё океанидаги барча пластик чиқиндиларнинг 28 фоизи катта эҳтимол билан Хитойга тўғри келади. Пластик чиқиндилар океанга қирғоқлар яқинидаги ахлаттепа ва полигонлардан тушади, ҳар йили 8 миллион тонна пластик оқизилади.
Аввалроқ Покистонда бир марталик пластик пакетлар тақиқлангани ҳақида хабар берилган эди.
Эслатиб ўтамиз, Ўзбекистонда 2019 йилдан бошлаб пластик халталарни бепул тарқатиш тақиқланганди.
Изоҳ (0)