Таълим сифатини назорат қилиш давлат инспекцияси таҳлилларига кўра, сўнгги уч йилда хорижий олий таълим дипломларини тан олиш ва нострификация қилишга оид аризалар 5,3 марта ўсган. Хусусан, рўйхатга олинган аризалар 2017 йилда 2409 та, 2018 йилда 4964 тани ташкил этган. Бу ҳақда АОКАда ўтказилган матбуот анжуманида айтиб ўтилди, дея хабар бермоқда «Дарё» мухбири Миролим Исажонов.
2019 йилда хорижий давлатларда таълим олганлик тўғрисидаги ҳужжатларни тан олиш ва нострификациялаш бўйича жами 12 867 та мурожаат келиб тушган бўлиб, шундан 3327 таси ёки 26 фоизи нострификацияланган. 997 та ҳужжат тўғридан-тўғри (махсус синовларсиз) тан олинган.
«Ўтган йилги жами аризаларнинг 72,4 фоизи қўшни мамлакатлар — Қозоғистон, Тожикистон, Қирғизистон ва Туркманистоннинг таълим муассасалари ҳужжатлари ҳиссасига тўғри келмоқда. Айтиш керакки, матбуотда ҳам кенг муҳокама қилиняпти: қўшни давлатлар чегарадан ўтгандан кейин жуда кўп олий таълим муассасаларини очиб юборяпти. У ерларда албатта, ўқиш арзон — таҳсил олишни номига 300, 400, 500 доллар қилиб қўйишади. Шу боис бизнинг ёшларимиз у ерга ўтиб ўқишмоқда. Биласизлар, ҳар бир давлатда нуфузли ва миллий рейтинги паст олий таълим даргоҳлари мавжуд. Агар бизнинг ёшлар таълим сифати паст билим масканларида ўқишса, ўзимизга қайтиб келишганидан сўнг нострификациядан ҳам ўта олмайди. Сабаби — билим даражаси яхши эмас, талабга жавоб бермайди.
Ҳозирги кунда юртимизда ОТМлар сонини кўпайтириб, қамровини оширишимиз керак. Концепцияда ҳам қамровни 50 фоизга ошириш бўйича топшириқ берилган. Лекин яна бир муҳим масала бор. Эртага шунча ёшларимиз олий маълумотли бўлса, уларга биз иш топиб бера оламизми ёки йўқми? Эртага шунча олий маълумотли кадрлар республикага керакми ё йўқ? Ҳозирги кунда энг асосий масаламиз таълим сифати бўлиши керак. Эртага қўлига олий маълумот дипломини олган кадр меҳнат бозорига муносиб билимли мутахассис бўлсагина, биз олий таълимда сифат бор деган хулосага келамиз. Ҳозирда таълим сифатини ошириш бўйича ислоҳотлар амалга ошириляпти. Аммо янада қаттиқ ишлашимиз зарур», — деди Таълим сифатини назорат қилиш давлат инспекцияси бошлиғи Улуғбек Тошкенбоев.
Тошкенбоевнинг таъкидлашича, 2019 йилда Россия, Беларусь ва Ўзбекистон ўртасида дипломларнинг тўғридан-тўғри тан олиниши бўйича келишувга эришилди.
«Ушбу масалани ҳукуматлараро даражада ҳал қилдик ва битимлар имзоладик. Энди Ўзбекистон ёшлари бу давлатларда ўқиса ёки у мамлакатлар ёшлари биздаги олийгоҳларда таҳсил олса, дипломлар ўзаро тан олинади ҳамда улар дипломи билан бемалол иш топа олишлари мумкин. Шунингдек, айни пайтда Жанубий Корея, Австралия, Америка каби давлатлар билан ҳам худди шу тартибда келишувларга эришиш борасида ишлар амалга оширмоқдамиз», — деди Тошкенбоев.
Таълим сифатини назорат қилиш давлат инспекцияси бошлиғининг қўшимча қилишича, эндиликда Россия ёки Беларусда Ўзбекистон дипломига эга ёшлар таълим даражасига қараб ишга жойлашишлари мумкин бўлади. Масалан, маълумоти бор одам Россияда фаррошлик қилишга мажбур бўлмайди.
«Таълимда бакалавр босқичи 6 даража, магистратура эса 7 даража ҳисобланади, бу даражаларга эга инсонлар энди ўзларига муносиб жойда ишлаши мумкин. Бу — жуда катта ютуғимиз», — деди Улуғбек Тошкенбоев.
Изоҳ (0)