Самарқанд шаҳрида газ етишмаслиги сабабли одамлар ўтин ёқишга ўтмоқда

Самарқанд шаҳридаги уйларда бир ҳафтадан буён газ етказиб беришда тез-тез узилишлар кузатилмоқда. Газ етказиб бериш билан боғлиқ муаммолар сабабли маҳаллий аҳоли ўтин ёқишни бошламоқда. Бу ҳақда «Новости Узбекистана» хабар берди.

Газ босими 5 январь, Ўзбекистонда парламент сайловининг иккинчи тури бўлиб ўтган кундан бошлаб кескин пасайган. Бу эса уйларда ҳароратнинг пасайишига олиб келган, айниқса, об-ҳавонинг ёмонлашиши шароитида бу жуда сезиларли бўлмоқда.

Нашрнинг хабар беришича, маҳаллий газ идораларининг раҳбарлари вазиятни «Ўзтрансгаз» томонидан ўрнатилган лимитлар билан изоҳламоқда. Шунингдек, улар ҳар соатда Самарқанддаги вазият ҳақида газ етказиб берувчиларни хабардор қилаётганини таъкидламоқда. Самарқанд вилояти ҳокими Эркинжон Турдимов ҳам вазият юзасидан ҳукуматга мурожаат қилган, бироқ вазият ўзгармаяпти, дейилади нашр томонидан берилган хабарда.

Қайд этилишича, икки ой аввал Эркинжон Турдимов газ лимит бўйича эмас, балки эҳтиёж бўйича етказиб берилишини маълум қилган эди. Бундан ташқари, маҳаллий ҳокимликлар сўнгги икки йил давомида газ қувурлари ва бошқа қурилмаларни таъмирлаш учун 92 миллиард сўм сарфлаган. Нашрнинг таъкидлашича, газ етказиб берувчи ташкилотлар истеъмолчилар билан шартнома тузмайди ва ўз бепарволиги учун ҳеч қандай жавобгар бўлмайди, бу эса ҳукумат томонидан тасдиқланган Ўзбекистон истеъмолчиларига газ етказиб бериш қоидаларининг бузилиши ҳисобланади.

Ижтимоий тармоқларда самарқандликлар газнинг ўчиши сабабли уйлар жуда совиб кетгани ҳамда одамлар овқат пишира олмаётганидан шикоят қилмоқда.

Истеъмолчиларнинг қайд этишича, газ билан боғлиқ муаммолар аввал ҳам бўлган, сайлов даврида вазият яхшиланган. Истеъмолчилар газ ҳали ҳам келаётган жойларда эса ундан ғалати ҳид чиқаётганини айтмоқда, чойнакдаги сувни иситиш учун эса икки соат кетиши мумкин. Уйни ўтин билан иситишга ўтган кишилар эса жуда кўп тутун ютишга мажбур бўлмоқда.

2019 йилнинг ноябрь ойида «Ўзтрансгаз» раиси Улуғбек Саидов компания аҳолига газ етказиб бериш услубини ўзгартирганини маълум қилган. Аввал компания «Ўзбекнефтгаз» томонидан олинган ресурслардан келиб чиққан бўлса, эндиликда газ ресурсларга боғлиқ бўлмаган ҳолда, асосланган талабдан келиб чиқиб етказиб берилиши қайд этилган эди.