Самарқандда мажбурий меҳнатга қарши чиққан банк ходими туман ҳокимлиги вакили томонидан калтакланди. Бу ҳақда «Дарё» мухбири Фарҳод Норбўтаев маълум қилмоқда.
«Дарё» мухбирига Самарқанд вилояти, Пайариқ туманида пахта мавсуми пайтида рўй берган ҳодиса тасвирга олинган видео келиб тушди. Видеода Пайариқ туман ҳокимлигининг ташкилий-назорат гуруҳи раҳбари Акбарали Эрназаров ҳамда «Халқ банки»нинг Пайариқ туман филиали ходими Икром Аралов ўзаро тортишиб қолгани акс этган.
Таҳририят манбасининг воқеага ойдинлик киритишича, Пайариқ туман ҳокимининг қурилиш масалалари бўйича ўринбосари Отабек Абдуллаев «бўлди дегандан кейин бўлди-да энди, деб Икром Араловни ажратиб, уни итариб юборган. Отабек Абдуллаевнинг «эллик маротаба сизларни ажратдим» деган сўзларидан англашилишича, Акбарали Эрназаров ҳамда Икром Аралов ўртасидаги келишмовчилик узоқ вақт давом этган.
Маълумотларга кўра, «Халқ банки»нинг Пайариқ туман филиали ходими Икром Аралов мажбурий меҳнатга қаршилик қилган. Ташкилий-назорат гуруҳи раҳбари Акбарали Эрназаров эса уни шу сабабли урган. Айтилишича, Акбарали Эрназаров ишдан олинган. Аммо туман ҳокимлиги ўз вақтида буни ошкор қилишни истамаган.
Изоҳ (0)