Янги йил байрами арафасида Тошкентдан Урганч ва Москвага қўшимча поездлар йўлга қўйилади

Янги йил байрами арафасида ва байрам кунларида йўловчи поездларига бўлган катта талабни ҳисобга олган ҳолда, Тошкентдан Урганчга ва Россия пойтахти Москвага қўшимча йўловчи поездлар йўлга қўйилади. Бу ҳақда «Ўзтемирйўлйўловчи» АЖ маълум қилди.

Хабар берилишича, жорий йилнинг 16 декабридан 2020 йилнинг 7 январига қадар «Тошкент—Урганч—Тошкент» йўналишида қўшимча поезд йўлга қўйилади.

Шунингдек, жорий йилнинг 14 декабридан 2020 йилнинг 11 январига қадар «Тошкент—Москва—Тошкент» йўналишидаги поезднинг қўшимча қатнови ҳам йўлга қўйилади.

Компания томонидан таъкидланишича, халқаро йўналишдаги поездларда олдиндан сотиб олиш муддатига боғлиқ равишда чипта нархининг 55 фоизигача чегирма тақдим этилади.

Қайд этилишича, чипта сотиб олишда имтиёзлардан фойдаланиш учун харидни темирйўл кассаларида амалга ошириш керак. Электрон чипталар учун чегирмалар қўлланилмайди.

Аввалроқ «Ўзбекистон темир йўллари» 2019 йилнинг 31 декабридан 2020 йилнинг 2 январига қадар маҳаллий йўналишларда йўловчиларга чегирмалар тақдим этгани ҳақида хабар берилган эди. Uzbekistan Airways эса 2019 йилнинг 31 декабридан 2020 йилнинг 2 январига қадар Янги йил байрами нишонланадиган муддатга республика ичидаги авиақатновлар учун чегирмалар эълон қилган эди.