Божхоначилар 1,2 млрд сўмлик газламаларнинг ҳужжатлари сохталаштирилганини аниқлади

Давлат божхона қўмитаси Контрабанда ва божхона қонунчилиги бузилишига қарши курашиш бошқармаси ходимлари томонидан божхона тўловларидан бўйин товлашга уринган шасхлар фош этилди. Бу ҳақда қўмита матбуот хизмати хабар берди.

«Сайхун» ташқи иқтисодий фаолият божхона постида «А.С.Р.» МЧЖ томонидан хориждан келтирилган 2 турдаги 30 тонна (42,7 минг метр узунликдаги) матоларни божхона кўригидан ўтказиш давомида уларнинг ташқи иқтисодий фаолият товарлар номенклатурасидаги кодлари ўзгартирилганлиги аниқланган.

Аслида тукли матолар ҳисобланган мазкур газламалар ҳужжатларда рангли иплардан тайёрланган трикотаж матолар сифатида таснифланган. Бу эса божхона тўловларининг тўғри ва тўлиқ ҳисобланишига тўсқинлик қилади.

Ҳозирда ушбу товарлар вақтинча сақловга олинган бўлиб, дастлабки ҳисоб-китобларга уларнинг умумий қиймати жами 1,2 миллиард сўмдан ошади.

Ҳозирда мазкур ҳолат юзасидан қўмита томонидан божхона текширувлари олиб борилмоқда.