Тошкентда енгил атлетика бўйича Ўзбекистон очиқ чемпионати бўлиб ўтди, деб хабар бермоқда Миллий олимпия қўмитаси.
Қайд этилишича, ушбу мусобақада Марказий Осиё мамлакатларидан ташриф буюрган атлетлар ҳам қатнашган.
Аёллар ўртасида баландликка сакраш секторида иштирок этган ўзбекистонлик Светлана Радзивил 1,96 метр баландликни забт этиб, олтин медал қатори Токио Олимпиадаси йўлланмасини ҳам қўлга киритди. Мазкур йўналишда Токио Олимпиадасининг нормативи айнан 1.96 метрни ташкил этарди. Ушбу йўналишда иштирок этган бошқа бир ўзбекистонлик спортчи Надия Дусанова эса 1,85 метр билан шоҳсупанинг иккинчи поғонасига кўтарилди.
Мусобақанинг эътиборли натижаларидан бирини Екатерина Воронина етти кураш баҳсларида қайд этди. 10 кун муқаддам Қатардаги Жаҳон чемпионатида 6099 очко тўплаган Воронина бу гал 6238 очко жамғариб, мусобақанинг олтин медалига эга чиқди.
Шу тариқа Светлана Радзивил фаолиятида тўртинчи бор Олимпиада йўлланмасини қўлга киритди. Радзивил бунгача Пекин (2008), Лондон (2012) ва Рио (2016) Олимпиадаларида ҳам иштирок этган эди.
Маълумот учун, бу Ўзбекистон терма жамоасининг Токио Олимпиадасига қўлга киритган 11-йўлланмасидир.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)