Россиянинг Екатеринбург шаҳрида ўтказилган бокс бўйича Жаҳон чемпионатида умумжамоа ҳисобида биринчи ўринни қўлга киритган Ўзбекистон терма жамоаси бош мураббийига Президент совғаси топширилди, деб хабар беради бокс федерацияси матбуот хизмати.
Мамлакат бош жамоаси Жаҳон чемпионатида 3 та олтин, 1 та кумуш ва 1 та бронза медални қўлга киритди. Бу ютуқларда терма жамоа бош мураббийи Марат Қурбоновнинг хизматлари ҳам эътироф этилди. 11 октябрь куни эса Марат Қурбоновга Президент совғаси — Tracker автомобили ва 100 миллион сўм миқдоридаги мукофот пули учун сертификат топширилди.
Тақдирлаш маросимида Миллий олимпия қўмитаси президенти Рустам Шоабдураҳмонов, МОҚ вице-президенти ва бокс федерацияси раисининг биринчи ўринбосари Сакен Пўлатов, МОҚ ва Ўзбекистон бокс федерацияси мутасаддилари иштирок этди.
Эслатиб ўтамиз, аввалроқ Жаҳон чемпионатида ғолиб ва совриндор бўлган спортчиларга Tracker, Gentra ҳамда Nexia 3 автомобиллари топширилган эди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)