O‘zbekistonlik yana bir atlet Tokio Olimpiadasiga yo‘llanmani qo‘lga kiritdi

Toshkentda yengil atletika bo‘yicha O‘zbekiston ochiq chempionati bo‘lib o‘tdi, deb xabar bermoqda Milliy olimpiya qo‘mitasi.

Qayd etilishicha, ushbu musobaqada Markaziy Osiyo mamlakatlaridan tashrif buyurgan atletlar ham qatnashgan.

Ayollar o‘rtasida balandlikka sakrash sektorida ishtirok etgan o‘zbekistonlik Svetlana Radzivil 1,96 metr balandlikni zabt etib, oltin medal qatori Tokio Olimpiadasi yo‘llanmasini ham qo‘lga kiritdi. Mazkur yo‘nalishda Tokio Olimpiadasining normativi aynan 1.96 metrni tashkil etardi. Ushbu yo‘nalishda ishtirok etgan boshqa bir o‘zbekistonlik sportchi Nadiya Dusanova esa 1,85 metr bilan shohsupaning ikkinchi pog‘onasiga ko‘tarildi.

Musobaqaning e’tiborli natijalaridan birini Yekaterina Voronina yetti kurash bahslarida qayd etdi. 10 kun muqaddam Qatardagi Jahon chempionatida 6099 ochko to‘plagan Voronina bu gal 6238 ochko jamg‘arib, musobaqaning oltin medaliga ega chiqdi.

Shu tariqa Svetlana Radzivil faoliyatida to‘rtinchi bor Olimpiada yo‘llanmasini qo‘lga kiritdi. Radzivil bungacha Pekin (2008), London (2012) va Rio (2016) Olimpiadalarida ham ishtirok etgan edi.

Ma’lumot uchun, bu O‘zbekiston terma jamoasining Tokio Olimpiadasiga qo‘lga kiritgan 11-yo‘llanmasidir.