АПЛда сентябрь ойининг энг яхши ўйинчиси ва мураббийи аниқланди

Англия чемпионатининг сентябрь ойидаги энг яхши ўйинчи ва мураббийи номи маълум бўлди.

Ўтган ой тўрт ўйинда иштирок этиб, бешта голга муаллиф бўлган «Арсенал» ҳужумчиси Пьер-Эмерик Обамеянг энг яхши ўйинчи деб топилди.

Ушбу соврин учун шунингдек, Трент Александер Арнольд («Ливерпуль»), Кевин Де Брюйне («Манчестер Сити»), Жон МакГинн («Астон Вилла»), Рияд Маҳрез («Манчестер Сити»), Сон Ҳин Мин («Тоттенҳэм»), Рикарду Перейра («Лестер») ва Каллум Уилсон («Борнмут») каби футболчилар даъвогарлик қилганди.

Энг яхши мураббий соврини эса Юрген Клоппга насиб этди. Сентябрда германиялик мутахассис бошчилигидаги «Ливерпуль» учта ўйинда уч ғалабага эришди. Клопп эса кетма-кет иккинчи марта ва фаолиятида бешинчи бор ушбу совринга эга чиқди.

Ундан ташқари Фрэнк Лэмпард («Челси»), Брендан Рожерс («Лестер») ва Эдди Ҳау («Борнмут») ойнинг энг яхшиси бўлиш учун номзод сифатида кўрсатилганди.