10 октябрь куни ижтимоий тармоқларда «Шакар қимматлаша бошлади», «Ўзбекистонда шакар 7 минг сўмгача кўтарилди» каби мавзудаги мақолалар эълон қилинган. Ушбу мақолаларда Давлат статистика қўмитасининг киритган маълумотига кўра, шакар нархи 5000 дан 7000 сўмгача қилиб кўрсатилган, деб ёзади ЎзА.
Мазкур маълумотга кўра, максимал нарх Термиз шаҳрининг «Термиз шаҳар деҳқон озиқ-овқат бозори», «Марказий деҳқон озиқ-овқат бозори»да дея айтилмоқда. «Ҳақиқатан, юртимизнинг олис нуқтасидаги бозорларда шундайдир балким. Шакар ишлаб чиқарувчи ва етказиб берувчи ташкилотлар бозорлардаги нархларни назорат қилиш ваколатига эга эмас. Мавсум вақтида бозор олғирлари нархни сунъий оширишга уринишмоқда»,— дейилади хабарда.
Аслида Давлат статистика қўмитасининг сайтида бир неча доимий истеъмолдаги маҳсулотларнинг нархлари кўрсатиб ўтилган бўлишига қарамай, ижтимоий тармоқлар «шакар» сўзига алоҳида урғу бермоқда.Ҳозирда Ўзбекистонда мавжуд иккита шакар ишлаб чиқарувчи корхона йилига 700 минг тонна шакар ишлаб чиқариш қувватига эга. Бу эса аҳолининг шакарга бўлган талабини импортсиз ҳам бемалол қондира олишини англатади.
«Ангрен-шакар» ва «Хоразм-шакар» заводида ишлаб чиқилаётган шакарнинг нархи Иқтисодиёт вазирлиги билан келишилган ҳолда 4950 сўм қилиб белгиланган.
«Мавсум давомида ҳам ушбу икки корхона шакар нархини ўзларича кўтаришга ҳаққи йўқ. Ваҳолангки, бунга эҳтиёж ҳам йўқ. Аҳолига мурожаат сифатида шуни айтиш лозимки, ҳар қандай мавсумда ҳам шакар нархи бир меъёрида сақлаб қолинади. Шакарга талаб қанчалик ортмасин зарур маҳсулотни ‘Ангрен-шакар’ ва ‘Хоразм-шакар’ корхоналари етказиб беришга қодир», — дейилади хабарда.
Изоҳ (0)