22 сентябрь куни Андижон туманида яшовчи А.Ю.га тегишли бўлган Damas русумли автомашина ойнасининг тусини ўзгартиришга берилган рухсатномаси сохта эканлиги аниқланди.
Андижон вилояти ИИБ матбуот хизматининг «Дарё»га хабар беришича, ушбу ҳолат бўйича тўпланган ҳужжатлар ҳуқуқий баҳо беришлик учун Андижон вилояти ИИБ ҳузуридаги Тергов бошқармасига юборилди ва Ўзбекистон Республикаси ЖКнинг 228-моддаси билан жиноят иши қўзғатилди.
Тергов ҳаракатлари давомида Асака тумани Дастурхончи МФЙда яшовчи Х.Р.нинг номига расмийлаштирилган Captiva русумли ҳамда Андижон шаҳрида жойлашган «ООО Фито Фарм» МЧЖга тегишли Nexia-3 русумли автомашиналар учун расмийлаштирилган автотранспорт воситаси ойналарининг тусини ўзгартиришга рухсат берилганлиги тўғрисидаги ҳужжатлар қалбакилиги аниқланди. Суриштирувда сохта ҳужжатлар Андижон шаҳрида яшовчи И.Ю. орқали тайёрланганлиги маълум бўлди.
Тергов ҳаракатлари давомида И.Ю. ушбу қалбаки рухсатномаларни таниши Хўжаобод туманида яшовчи Н.А. орқали тайёрлаганлигини билдирди. Профилактик суҳбат жараёнида Н.А. ўзининг ёнида бўлган 5 дона қалбаки рухсатномани тақдим этди. Н.А. қалбаки рухсатномаларни Андижон шаҳрида яшовчи Ш.А, томонидан унинг яшаш хонадонида тайёрлатганлигини маълум қилди.
ИИВ ўз хавфсизлиги бошқармаси Андижон вилояти бўйича бўлими ҳамда Андижон шаҳар ички ишлар органлари фаолиятини мувофиқлаштириш бошқармаси ҳузуридаги тергов бўлими ходимлари ҳамкорлигида Андижон шаҳри Пахтакор МФЙ Чинобод кўчасида жойлашган 10-уй 16-хонадон холислар иштирокида тинтув қилинганида бу жойдан ҳужжатларни қалбакилаштириш учун фойдаланиб келинаётган компьютер жамланмалари, қалбакилаштирилган ҳайдовчилик гувоҳномалари, огоҳлантириш талонлари, автомашиналар ойналарини тусини ўзгартиришга рухсатномалар бланкалари, ўндан ортиқ фуқароларнинг биометрик паспортлари , яна ўндан ортиқ транспорт воситаларини қайд этиш гувоҳномалари ҳамда ишга алоқадор бошқа ашёлар олинди. Ш.А. билан олиб борилган профилактик суҳбатда шу кунгача 30 дан ортиқ қалбаки рухсатномаларни тайёрлаганлигини баён қилди.
Ҳозирда юқоридаги ҳолатлар бўйича Андижон шаҳар ички ишлар органлари фаолиятини мувофиқлаштириш бошқармаси ҳузуридаги Тергов бўлими томонидан дастлабки тергов ҳаракатлари олиб борилмоқда.
Изоҳ (0)