Фарғона вилояти Ўзбекистонда биринчи бўлиб пахта топшириш режасини бажарди

Фарғоналик пахтакорлар мамлакатда биринчи бўлиб, жорий йилги пахта топшириш шартномавий режани бажарди. Бу ҳақда ЎзА хабар берди.

Фермер хўжаликлари томонидан мўл ҳосил етиштирилиб, 238 минг 600 тоннадан ортиқ пахта хирмони бунёд этилди, унинг аксарият қисми юқори навларга сотилди. Ўтган йили биргина Риштон туманида, жорий йилда эса вилоятнинг 9 та туманида пахта-тўқимачилик кластерлари ташкил этилди.

Вилоятдаги 2 минг 149 та фермер хўжаликлари 82 минг 80 гектар майдонга чигит экди. Ғўзани навлар бўйича жойлаштиришда аввало ҳудудларнинг тупроқ-иқлим шароити, сув таъминоти ҳамда соҳанинг етакчи олим ва мутахассислари, фермер хўжаликлари раҳбарлари, шунингдек, кластер корхоналари таклифлари инобатга олинди. Ғўзанинг «С-8290», «Наманган-77», «Султон», «С-6524» навлари экилиб, агротехник тадбирларга муҳим эътибор қаратилди. 6 минг 980 гектар майдонда янги навлар синовдан ўтказилди.

Инновацион усул суғориш тизимида ҳам синовдан ўтказилди. 331 гектар майдонда томчилатиб, тупроқ шароити сувни кўп сарф қилинадиган майдонларда 176 комплект эгилувчан қувурлар орқали суғориш жорий этилди. Вилоятда ғўза парваришида унинг ривожини тезлаштириш ва ҳосилдорликни 3-5 центнерга ошириш мақсадида биологик фаол моддалар-биостимуляторлар қўлланди.

Кластер корхоналари томонидан моддий-техник базани мустаҳкамлаш масаласи асосий вазифа сифатида белгиланди. Жорий йилнинг ўзида умумий қиймати 50 миллиард сўмдан ортиқ бўлган 40 дона ҳайдов трактори, 100 дона чопиқ трактори, 80 дона транспорт трактори, 120 дона чигит экиш сеялкаси, 90 дона култиватор, 300 дона омоч, 85 дона пуркагич, 35 дона минерал ўғит сепиш мосламалари олиб келиниб, агротехник тадбирларни ўз вақтида амалга оширилишига эришилди.

Вилоятнинг Ёзёвон, Қўштепа, Риштон туманлари 15 иш кунида давлатга пахта сотиш шартномавий режасини республикада биринчи бўлиб бажарди. Шунингдек, Тошлоқ, Фурқат, Учкўприк, Бувайда туманлари ҳам пахта хирмонига муносиб ҳисса қўшди. Бугун бошқа туманлар ҳам астойдил ҳаракат қилмоқда.

Вилоят бўйича 2019 йилда пахта хом ашёси етиштириш ва териб олиш учун 877 миллиард 225 миллион сўмдан ортиқ маблағ сарфланди. Етиштирилган пахтадан фермер хўжаликлари кесимида олинган аниқ ҳисоб-китобларга асосан 340 миллиард сўм фойда олиниши кутилмоқда.

Фарғоналиклар мавсум якунига қадар ҳосилдорликни 34-35 центнерга етказишни режалаштирган.