Қирғизистон Туризм департаменти раҳбари Мақсат Дамир ўғли Анталияни Иссиқкўл билан солиштирмасликни сўради. Бу ҳақда у Tazabek нашрига берган интервьюда айтган.
Унинг сўзларига кўра, Туркия бу мутлақо бошқа мамлакат ва Қирғизистонни Туркия билан солиштирмаслик керак. Чунки уларнинг иқлим шароити турлича. Анталияда мавсум 6—7 ой давом этса, Иссиқкўлда 35—40 кун давом этади ва шунга кўра нарх-навонинг асосий йўналишлари келиб чиқади.
«Иссиқкўл ва Анталияга миллион доллар инвестиция киритган шахсларнинг қай бири ютади? Табиийки, Анталияда 6 ой ичида даромад топади ва нархлар ҳам Иссиқкўл инвесториникига нисбатан арзон бўлади. Аммо Иссиқкўл шундай иқлим шароитида дам олишни хоҳлайдиган ўз мижозларига эга. Анталия ҳам ўз туризм тарихига эга ва унда кўплаб туризм секторлари бирлашиб, all inclusive яратади», — дейди у.
«Масалан, тиббий туризм ҳақида гапиришни бошласалар, турк авиакомпаниялари муайян чегирмалар беришни бошлайди, меҳмонхоналар ҳам чегирма тақдим этади ва бир бутунликда уларнинг нархи бизникидан арзон бўлади», — деб айтган Мақсат Дамир ўғли.
Унинг қўшимча қилишича, Қирғизистондаги меҳмонхоналар дунёга машҳур брендлар эмас. «Ҳозирда Hyatt, Sheraton, Novotel каби брендлар пайдо бўлмоқда. Бу янги нарса, аммо бу туризм ривожи учун етарли эмас. Умуман олганда, шундай майда деталлардан нарх-наво шаклланади. Шу сабабли давлат бу ерда назорат қилиши эмас, балки инвестициялар жалб этиш учун бизнесга қулай шароит яратиб бериши керак», — дейди департамент раҳбари.
Унинг фикрича, табиий рақобат мавжуд бўлганда хизмат сифати ортиши, нархлар эса пасайиши кузатилади.
Изоҳ (0)