АҚШ президенти Дональд Трамп нима сабабдан Афғонистон билан тинчлик музокараларини ўтказишни бекор қилиш бўйича қарор қабул қилганига изоҳ берди, деб хабар қилади «РБК».
«Менга келадиган бўлсак, фикримча, музокаралар ўлди», — дейди Трамп. Америка етакчисининг сўзларига кўра, «Толибон» ҳаракати америкалик ҳарбий ҳалок бўлган Кобулдаги теракт бўйича масъулиятни ўзи зиммасига олганидан сўнг, у музокараларни давом эттира олмаган.
Афғонистондан олиб чиқиб кетилиши керак бўлган 14 минг ҳарбий ҳақида АҚШ президенти «вақти келганда» дея жавоб қайтарган.
Трамп Афғонистон президенти Ашраф Ғани, шунингдек, «Толибон» етакчилари билан 8 сентябрь куни музокара ўтказиши керак эди. Бироқ Кобулда 12 кишининг умрига зомин бўлган теракт сабаб учрашув бекор қилинди.
Август ойининг охирида бир қатор нашрлар АҚШ ва «Толибон» Америка қўшинларини Афғонистондан олиб чиқиб кетиш шартларини келишиб олгани ҳақида хабар берганди. Келишув натижаларига кўра 5 минг нафар ҳарбий дарҳол мамлакатни тарки этиши керак эди.
Изоҳ (0)