Британия парламенти яна бир бор Жонсоннинг муддатидан олдин сайлов ўтказиш борасидаги сўровини рад этди

Буюк Британия парламентининг қуйи палатаси аъзолари бош вазир Борис Жонсоннинг октябрда муддатидан олдин парламент сайловларини ўтказиш борасидаги таклифини яна бир бор рад этди, деб хабар беради «Коммерсанть».

The Guardian нашрининг ёзишича, Буюк Британия ҳукуматининг иши 14 октябрга қадар тўхтатиб қўйилган.

15 октябрь куни ўтказилиши мумкин бўлган муддатдан олдинга сайловларга 293 депутат овоз берган бўлса, 46 нафар депутат бунга қарши «қўл кўтарган». Бироқ парламентнинг бир қисми овоз бериш жараёнларида иштирок этмаган. Жонсоннинг таклифи маъқулланиши учун 434 та овоз керак эди.

Ҳукумат 14 октябрга қадар танаффус эълон қилган. Муддатидан олдинги сайловларни фақатгина ноябрь охирида — Буюк Британиянинг Европа Иттифоқидан чиқиши кутилаётган санадан кейин ўтказиш мумкин.

«Ҳукумат Brexit’ни қолдириш бўйича сўров юбормайди. Мен 17 октябрь куни саммитга бораман ва келишувга эришиш учун қўлимдан келган барча ишни қиламан», — дейди бош вазир.

Лейбористлар партияси етакчиси Жереми Корбин амалдаги парламентни «уятли» деб атаб, парламент ишининг тўхтатилиши фақатгина бош вазирнинг «нима қилиш керак ёки керакмас деган саволларидан қочиш» учун зарур бўлганини таъкидлади.

Эслатиб ўтамиз, қиролича Елизавета II томонидан тасдиқланган қонунга кўра, Brexit 2019 йил 31 октябрь куни бўлиб ўтадиган битимсиз ўтказилмайди.