Qirg‘iziston Turizm departamenti rahbari Maqsat Damir o‘g‘li Antaliyani Issiqko‘l bilan solishtirmaslikni so‘radi. Bu haqda u Tazabek nashriga bergan intervyuda aytgan.
Uning so‘zlariga ko‘ra, Turkiya bu mutlaqo boshqa mamlakat va Qirg‘izistonni Turkiya bilan solishtirmaslik kerak. Chunki ularning iqlim sharoiti turlicha. Antaliyada mavsum 6—7 oy davom etsa, Issiqko‘lda 35—40 kun davom etadi va shunga ko‘ra narx-navoning asosiy yo‘nalishlari kelib chiqadi.
“Issiqko‘l va Antaliyaga million dollar investitsiya kiritgan shaxslarning qay biri yutadi? Tabiiyki, Antaliyada 6 oy ichida daromad topadi va narxlar ham Issiqko‘l investorinikiga nisbatan arzon bo‘ladi. Ammo Issiqko‘l shunday iqlim sharoitida dam olishni xohlaydigan o‘z mijozlariga ega. Antaliya ham o‘z turizm tarixiga ega va unda ko‘plab turizm sektorlari birlashib, all inclusive yaratadi”, — deydi u.
“Masalan, tibbiy turizm haqida gapirishni boshlasalar, turk aviakompaniyalari muayyan chegirmalar berishni boshlaydi, mehmonxonalar ham chegirma taqdim etadi va bir butunlikda ularning narxi biznikidan arzon bo‘ladi”, — deb aytgan Maqsat Damir o‘g‘li.
Uning qo‘shimcha qilishicha, Qirg‘izistondagi mehmonxonalar dunyoga mashhur brendlar emas. “Hozirda Hyatt, Sheraton, Novotel kabi brendlar paydo bo‘lmoqda. Bu yangi narsa, ammo bu turizm rivoji uchun yetarli emas. Umuman olganda, shunday mayda detallardan narx-navo shakllanadi. Shu sababli davlat bu yerda nazorat qilishi emas, balki investitsiyalar jalb etish uchun biznesga qulay sharoit yaratib berishi kerak”, — deydi departament rahbari.
Uning fikricha, tabiiy raqobat mavjud bo‘lganda xizmat sifati ortishi, narxlar esa pasayishi kuzatiladi.
Izoh (0)