Равшан Эрматов бошчилигидаги Ўзбекистон футбол ассоциацияси делегацияси Малайзия пойтахти Куала Лумпур шаҳрида Осиё футбол конфедерациясининг келишилган ўйинлар ва тотализаторга қарши кураш бўйича масъуллари — AFC Integrity департаменти раҳбари Аҳмед Алосайми ҳамда Sportradar компанияси директори Оскар Бродкин билан учрашув ўтказди. Бу ҳақда ЎФА хабар берди.
Фото: ЎФА
Таъкидланишича, учрашув чоғида ОФК вакиллари Ўзбекистондаги ички мусобақаларда келишилган ўйинлар ташкил этилишига қарши курашда Ўзбекистон футбол ассоциациясини тўлиқ қўллаб-қувватлашини ҳамда бу борада ўзаро ҳамкорликда иш олиб боришга тайёр эканини маълум қилган.
Шунингдек, ФИФА ҳакамлар қўмитаси раиси ўринбосари Ҳани Баллан ҳамда ОФК ҳакамлар бошқармаси директори Шамсул Майдин билан ҳам учрашув ўтказилган. Унда Осиёдаги ва Ўзбекистондаги ҳакамликни ривожлантириш, ҳакамлар савияси ва маҳоратини ошириш учун семинарлар ташкил этиш, VAR тизими каби масалалар муҳокама қилинган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Телеграмъдаги расмий спорт канали — @daryo_sport’га обуна бўлинг!
