«Янги Бускетс» учун 62 млн фунт? Пеп Гвардиоланинг навбатдаги қимматбаҳо «жавоҳири» ҳақида

«Манчестер Сити»нинг жорий йил ёзги трансферлар вақтидаги илк хариди Родриго Эрнандес бўлди. «Шаҳарликлар» қисқа қилиб айтганда — Родри учун Мадриднинг «Атлетико» клубига 62,8 миллион фунт тўлади. Таъкидлаш лозим, Мадрид клуби тарбияланувчиси бўлган Родри 2018 йил ёзига келибгина «Атлетико» сафига қайтганди. Унинг бир йил ичида катта ўсишга эришгани эса катта клубларни беэътибор қолдирмади.

«Сити» Родрига қизиқиш билдирган ягона гранд жамоа эмасди. Жумладан, «Бавария» 22 ёшли испаниялик хавбекни ўз сафига қўшиб олишга жиддий ҳаракат қилди, бироқ Пеп Гвардиоланинг собиқ жамоаси бунинг устидан чиқа олмади.

«Манчестер Сити» нима учун Родрини танлади?

Пеп Гвардиола «Манчестер Сити» (2016 йил) бошқарувига келгач, бразилиялик ярим ҳимоячи Фернандиньо «шаҳарликлар»нинг алмаштириб бўлмас футболчисига айланди. Буни унинг статистикаси қараб ҳам билса бўлади. Фернандиньо бутун мавсум давомида барча жамоадошларидан кўра кўпроқ ўйин ўтказди — жами 8 минг дақиқа. Тўғри, Раҳим Стерлинг, Давид Силва ва Кевин де Брюйне ҳам «Сити»нинг алмаштириб бўлмас ўйинчилари, бироқ статистика билан тортиришиб бўлмайди. Улар ҳам Фернандиньодан анча кам майдонга тушган.

«Шахтёр»дан 2013 йил Англия Премьер лигасига кўчиб ўтган Фернандиньо ҳар мавсум ўртача 45 тадан ўйин ўтказди. Қисқа қилиб айтганда, бразилиялик — фойдали, ишончли ва барқарор ўйин кўрсатди. Фақат 2018/19 йилги мавсум келиб, Фернандиньога вақт ўз ҳукмини ўтказаётгани кўрина бошлади. У 34 ёшда ва энди ёш бола эмас. Маълумотларга кўра, футболчи Манчестердаги фаолияти давомида 5 марта жароҳат олган. Шулардан 4 тасига эса 2018/19 йилги мавсумда йўлиққан. «Сити» йиллар давомида ўз қаҳрамонига муносиб ўринбосар топа олмай келди ва якунда 22 ёшли испаниялик номзодида тўхтади.

Родрининг ўйин услуби қандай?

Бўйи салкам 2 метр (191 см) бўлган Родрининг майдондаги ўрни уни «янги Бускетс» дея аташлари учун етарли бўлди. Бу ҳайратланарли ҳолат эмас, албатта. Родри ҳам худди Бускетс каби ўйинни назорат қилиб, жамоаси тўпни ўзида ушлаб туриши учун барча имкониятини ишга солади. Унинг ўйин услуби эса шунчаки оддий, узатмалари ҳам таваккалчиликка асосланмаганлиги билан ажралиб туради.

Кўпчилик Фернандиньонинг ижодкорлигини унутиб қўйиши мумкин. Родри эса бразилияликдан фарқли ўлароқ «ақлли паслари» билан танилган эмас. Унинг асосий кучи — ҳимояда. Родри ўйинни қойилмақом тарзда ўқий олади ва шу боисдан ҳам доимо керакли жойда вақтида пайдо бўла олади. У ўтган мавсум Ла Лигада тўпни олиб қўйиш бўйича иккинчи ўринда қайд этилди. У лиганинг энг яхши иккинчи жамоасида тўп сурган бўлса ҳам бу кўрсаткич олқишга арзийди. Родри тактик фоллардан фойдаланиб туради: у ўтган мавсумда битта ўйинда ўртача 1,7 та қоида бузишга мажбур бўлган. Ла Лиганинг 34 та ўйинида эса атиги 5 та сариқ карточка ишлаб олган.

У «Сити»да ўйнаб кета оладими?

Пеп Гвардиола одатда янги келган ўйинчиларга мослашиб олишлари учун 6 ой вақт беради. Масалан, Бернарду Силва, Лерой Сане ва Аймерик Ляпортлар билан ҳам шундай бўлган. Агар Фернандиньо яхши формада бўлиб турса, у ҳолда бразилиялик мавсумни 4-3-3 схемасида асосий таянч ярим ҳимоячиси сифатида бошлайди. Бундай ҳолатда Родри янги жамоасига қандай кўникиб кетади дейсизми? Испаниялик 22 ёшли футболчи каттагина маблағ тўлангани ҳисобга олинадиган бўлса, унга жамоада етарлича ўйин амалиёти тақдим этилишини кутиш мумкин. Балки, мавсум ўрталарига келибоқ Родри Фернандиньони ортда қолдириб, асосий таркиб футболчисига айланар. Ахир Фернандиньо келаси йил май ойида 35 ёшни қарши олади.

Гвардиола эса Кевин де Брюенинг жароҳати ўтмишда қолганига умид қилади. Ва жамоа ярим ҳимоясида Давид ва Бернарду Силва, Родри ҳамда де Брюйнеларни бирлаштиришга ҳаракат қилади.

У бу пулларга арзийдими?

«Сити»нинг сўнгги уч трансфери клуб тарихига рекорд сифатида кирди. «Шаҳарликлар» Риёд Маҳрезни 60 миллион фунтга сотиб олган бўлса, Аймерик Ляпорт учун 57 миллион фунт тўлаган эди. «Атлетико М» Родрини бир йил олдин «Вильярреал»дан 17,8 миллион фунтга сотиб олгани ҳисобга олинса, «Сити» унинг учун тўлаган 62,8 миллион фунт у даражада қўрқинчли сумма эмас. Агар «Манчестер Сити» томондан назар солинадиган бўлса, бундай трансфер суммалари клубни хавотирга солган эмас. Янги ўйинчилар учун сарфланган пуллар эса ўзини оқлашни бошлаб юборган. Жумладан, Маҳрез, Ляпорт, Уокер, Менди, Силва, Эдерсон ва Данилолар клубда ўз ўрнига эга бўлиб улгурди.

Родри ҳам «Иттиҳод»да тасодифан пайдо бўлиб қолгани йўқ. Жамоада у ҳаракат қиладиган чизиқда бўшлиқлар вужудга келгани учун Родри учун катта маблағ тўлашдан қочилмади. Тўғри, Илкай Гундўған ҳам бор, бироқ у ҳам Фернандиньонинг ўрнини боса олмайди.

Умумий рейтинг: 8/10

Гвардиола клуб хўжайинларига трансфер бозоридаги энг асосий мақсади эканлигини тушунтира олди. «Сити» эса ўз ниятига эришмасдан қолмади. Унинг иқтидори, имконияти ва ёши ҳисобга олинадиган бўлса, Родрининг фойдаси «Сити»га ҳали кўп йиллар давомида тегиши мумкин.