«Ҳали яна топ даражада футбол ўйнашни хоҳлайман. Европани ҳозирча тарк этиш иштиёқида ёнаётганим йўқ. Камига 26 ёш фаолиятимда танаффус қилиш учун жуда эрта деб биламан», — деган эди Стефан ал-Шаарави La Repubblica нашрига берган интервьюсида.
Мазкур интервьюдан бир ҳафта ўтиб эса, Стефан ўйланиб қолди.
Нима учун Стефан барибир Хитойга кетди?
Бу ерда асосий масалани хоҳлаймизми ёки йўқ барибир пул ҳал қилгани кўриниб турибди. Стефаннинг «Рома» билан шартномаси бир йилдан кейин, яъни 2020 йил 30 июнда якунланар эди. У билан шартномани узайтириш борасида музокаралар янги спорт директори Жанлука Петракининг асосий вазифаларидан бири эди. Бироқ у музокараларни бошлашга ҳам улгурмади. Маълумотларга кўра, ал-Шаарави «Рома»дан 4 йиллик шартнома ва йилига 3 миллион евро маош сўраган. Шунда ҳам бонуслардан ташқари. Бу орада «Шанхай Шеньхуа» футболчига «Рома»дан сўраганидан 5 баробар кўп маош таклиф қилди — 16 миллион евро.
Бу таклиф келиши билан фақат битта масала қолганди, холос. Клублар келишса бўлди эди. Хитой клуби футболчи учун «Рома»га 10 миллион евро таклиф қилди, римликлар эса 30 миллион евро талаб қилди. Охир-оқибат томонлар 18 миллион еврода бир тўхтамга келди.
Мана энди эса Стефан ал-Шаарави дунёдаги энг кўп ҳақ тўланадиган италиялик футболчига айланди-қолди.
Энг кўп ҳақ тўланадиган италиялик футболчилар рўйхати:
- Стефан ал-Шаарави — 16 миллион евро
- Грациано Пелле — 15 миллион евро
- Себастьян Жовинко — 10 миллион евро
- Марко Верратти — 6 миллион евро
- Жанлуижи Доннарумма — 6 миллион евро
- Жоржиньо — 5,5 миллион евро
- Леонардо Бонуччи — 5,5 миллион евро
- Эдер — 5,2 миллион евро
- Лоренцо Инсинье — 4,6 миллион евро
- Жоржио Келлини — 4 миллион евро
Шу билан Стефаннинг фаолияти якунланадими?
Балки ал-Шааравининг ўзи ҳали қайси Шанхай клубига ўтганини англаб етмагандир. Ахир у Ҳалк, Оскар ва Одил Аҳмедов тўп сураётган «Шанхай СИПГ»га эмас, балки Хитой чемпионатида 16 та жамоа орасида 14-ўринда бораётган, қуйи лигага тушиб кетиши мумкин бўлган «Шанхау Шеньхуа» клубига ўтди. Чемпионат якунига қадар ҳали олдинда яна 14 та тур бор. Бироқ клубнинг олий дивизионда қолиши учун Стефан ҳам ёрдам бера олмаслиги мумкин. 6 июль, шанба куни «Шеньхуа» ўша юқорида номи тилга олинган Ҳалкдан бир эмас, иккита гол қабул қилиб, 1:3 ҳисобига «СИПГ»га мағлуб бўлди. Ундан аввалги турда эса жамоа «Гуанчжоу Эвергранд»га 0:3 ҳисобида ютқазиб қўйганди. 14 та ўйинда 10 та мағлубият. Тўплар нисбати 18-29. Ал-Шааравини Хитойда унутилмас онлар кутиб тургани эса исбот талаб қилмас аксиомага айлангани айни ҳақиқат.
Энг катта савол эса Стефан қачон Европага қайтади? Аксел Витсель ва Паулиньо билан боғлиқ мисолларни оладиган бўлса, ал-Шаарави бемалол яна Европа яшил майдонларига қайтиши мумкин. Ахир Витсель ва Паулиньо «Боруссия Д» ҳамда «Барселона»ни эътиборини торта олди-ку!?
Стефан эса эндигина 26 ёшда. Унинг «Шеньхуа» билан шартномаси 3 йилга мўлжалланган. Бутун фаолияти давомида ишлаши мумкин бўлган пулни 3 йилда топиб, ортга қайтиш режаси ҳар ҳолда ёмон эмас, тўғрими!?
«Шанхай Шеньхуа» яна кимларни сотиб олиши мумкин?
Ёзнинг бошлари Италия спорт нашрлари «Ювентус»нинг колумбиялик аъзоси Хуан Куадрадонинг «Шеньхуа»га ўтиши мумкинлиги ҳақида хўб ва кўп ёзди. Маълумотларга кўра, хитойликлар Куадрадога йиллик 10 миллион евро маош таклиф қилган. Бундан ташқари кечагина «Шанхай СИПГ» билан шартнома имзолаган Марко Арнаутович «Шеньхуа»га келиши мумкинлиги ҳақида хабарлар берилди. Шунингдек, «Спартак» вакили Фернандо, «Интер» аъзоси Иван Перишичлар билан музокаралар олиб борилаётгани ҳақида бонг урилмоқда.
Бундай трансфер «Рома»га нимага керак?
Рим клуби босслари ҳар трансфер ойнасида етакчилардан воз кечишда давом этмоқда. Ўтган ёзда клуб Алиссон, Строотман ва Наингголан билан хайрлашганди. Ундан аввал эса Муҳаммад Салоҳ ҳамда Антонио Рюдигерни сотиб юборганди. Энди эса клуб жамоа сардори Даниел де Росси, ҳимоячи Костас Манолас ҳамда Стефан ал-Шаарави билан хайрлашди. Камига жамоанинг асосий ҳужумчиси Эдин Жеко «Интер»га ўтиши кутилмоқда. Клуб 2013—2019 йиллар оралиғида ҳар мавсум 28,5 миллион евродан 126,9 миллион еврогача футболчи сотди. «Рома» А Серияда ўтган мавсумни 6-ўринда якунлади. Жамоа шундан сўнг деярли ярим таркибини янгилади Италияда умуман фаолият олиб бормаган мураббийни олиб келди. Агар янги мавсум «Рома» ҳозир «Шеньхуа» юрган ўринларда бўлса, ҳеч ким ҳайрон қолмаслиги ҳам табиий ҳол бўлади. Ал-Шаарави ҳам Хитойга айнан шу жиҳатларни ҳисобга олиб кетган бўлса не ажаб.
«Рома» хўжайини Жеймс Паллотта эса клуб олаётган фойда йилдан йилга кўпайиб бораётганлигидан мамнун.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)