Фотогалерея: Тошкентда ўзбек спорти тарихидаги илк триатлон мусобақаси бўлиб ўтди

Ўзбекистон триатлон федерацияси кўмагида Тошкентдаги BeFit Fitness вa Wellness спорт мажмуасида ҳаваскорлар ўртасида триатлон бўйича ўзбек спорти тарихидаги илк мусобақа 7 июль, якшанба куни бўлиб ўтди.

Бефит Indoor Тriathlon мусобақаси Ўзбекистонда триатлонни оммалаштириш ва янада ривожлантириш, аҳоли ўртасида соғлом турмуш тарзини тарғиб қилиш, мусобақада энг яхши натижаларни кўрсатган кучли иштирокчиларни аниқлаш, шунингдек, спорт байрами муҳитини яратиш мақсадида ташкил этилди.

Indoor-триатлон классик триатлондан фарқли бўлиб, унда барча босқичлар ёпиқ жойда бўлиб ўтади: сузиш босқичи – ҳовузда, велопойга – велосипед машқ ускунасида, югуриш эса – югуриш йўлакчасида. Мазкур мусобақада босқичлар ўтиш учун маълум вақт ажратилди: 10 дақиқа сузиш, 30 дақиқа велосипед, 20 дақиқа югуриш ва 5 дақиқа – транзит зоналарни ўтиш учун. Ушбу форматда эркаклар ва аёллар ўртасида ғолиблар уч босқичдаги масофалар йиғиндиси бўйича аниқланади.

Беллашувда 30 нафар ҳаваскор триатлет иштирок этди. Аҳамиятли жиҳати, улар орасида таниқли маҳаллий ва халқаро компанияларнинг топ-менежерлари ҳам бор. Шунингдек, мусобақа доирасида триатлон бўйича Ўзбекистон ёшлар терма жамоаси аъзолари томонидан мастер-класс намойиши ҳам бўлиб ўтди.

Мусобақа якунига кўра, эркаклар ўртасида Семен Шадрин 24.420, аёллар ўртасида эса Анна Романика 20.77 вақт натижасини кўрсатган ҳолда ғолибликка эришди.

Меҳмонлар ва томошабинлар учун байрам ва спорт дастури бўлиб ўтди. Жумладан, улар махсус спорт ускуналари ёрдамида ўзларини триатлонда синаб кўриш имконига эга бўлдилар. Болалар учун интерфаол спорт ўйинлари ушбу триатлон байрамининг энг ёрқин жиҳатларидан бирига айланди. Бундан ташқари, тадбир Тошкентдаги 3 та катта истироҳат боғлари ҳудудида жонли эфирга узатилди:

• Заҳириддин Муҳаммад Бобур номидаги Тошкент Марказий эко боғи;
• Мирзо Улуғбек номидаги Central Park;
• Ғафур Ғулом номидаги маданият ва истироҳат боғи.

Триатлон – бугунги кунда энг жадал ривожланаётган оммавий спорт турларидан бири. Бутун дунё бўйлаб триатлон билан шуғулланувчи одамлар сони кўпайиб бормоқда. Учта алоҳида даврий спорт турини бирлаштирган ҳолда, триатлон ҳаракат, чидамлилик ва жасорат каби хусусиятларни ўзида акс эттиради.

Ҳаваскор ва профессионаллар бу спорт нафақат жисмоний соғлиққа, балки фикрлаш тарзини ҳам ўзгартиради – бу одамни янада ишончли, мақсадли ва стрессга чидамли қилади дея таъкидлайдилар. У қўлга киритилган нарсалар билан тўхтаб қолмасликка, янги мақсадларни белгилашга – доимо ўз устида ишлаш ва ривожланишга ўргатади.