Тошкент шаҳри Чилонзордаги «Шуҳрат» чорраҳасида фирибгар шахс қўлга олинди. Бу ҳақда ЎзА хабар берди.
«Шуҳрат» чорраҳаси жойлашув нуқтаси ҳар томонлама қулай бўлгани учун ўзига яраша шуҳрат топган. Бироқ, бу чорраҳанинг жиноятлар уяси сифатида «шуҳрат» топаётгани ачинарли.
Аввал бу чорраҳада гиёҳванд моддалар «қора» бозори мавжудлиги, ўтган йилда бунга барҳам бериш учун бу ерда 66 маротаба тезкор тадбир ўтказилган. Тадбирларда 341 нафар ҳуқуқбузар шахсга нисбатан тегишли тартибда чоралар кўрилиб, таркибида психофаол моддалари бўлган 41 мингга яқин «Трамадол» ва 268 дона «Лирика» дори препарати далилий ашё сифатида олинган.
Яна бир ҳолатда «Шуҳрат» чорраҳаси «пора бериш» жиноятига «гувоҳ» бўлди. Навбатдаги бу жиноят фирибгарлик билан боғлиқ.
Кореяда ишлаш орзусидаги икки йигит ўқув курсида корейс тилини ўрганиш билан банд эди. Лекин улар таълим бераётган ўқитувчи билан ўзаро суҳбатда катта маошли иш топиш мумкин бўлган бу давлатга бориш учун тил билишнинг ўзи кифоя эмаслиги «аён» бўлган. Устози эса гапни чўзиб ўтирмай, «бу иш 9 минг долларга битади», — деган.
Бу шахс «Фаст анд эасй» нодавлат таълим муассасаси раҳбари М.Р. бўлиб, бу ишни ёлғиз ўзи қилолмаслиги, балки «Ҳой фаст анд эасй» нодавлат таълим муассасасининг раҳбари Б.С. билан бирга, унинг юқори ташкилотда ишловчи танишлари орқали битиришини айтади.
Кореяга бориш истагидаги йигитлар қарз-у ҳаволалар эвазига бири 4,5 минг, яна бири 3,3 минг доллар топган.
Буни эшитган М.Р. пулни Тошкент шаҳар Чилонзор туманидан ўтувчи Кичик халқа йўлида жойлашган «Шуҳрат» чорраҳасига олиб келишларини айтган. Икки йигитдан 7,8 минг доллар олиб, уни шахсий манфаатлари йўлида ишлатмоқчи бўлган.
Айни шу ҳолатга ҳуқуқни муҳофаза қилувчи органларининг аралашуви унга ҳалақит берган. М.Р. улардан қутулиш учун шеригини сотган.
Шу тариқа ўзгалар маблағини фирибгарлик йўли билан қўлга киритишга уринган бу икки шахснинг иши судга оширилган.
«Мазкур жиноят ишини кўриб чиқишда, судланувчиларнинг бу жиноятни ғаразли ниятларда содир этгани жазони оғирлаштирувчи ҳолат, деб баҳоланди. Уларнинг айбига тўлиқ иқрорлиги, содир қилган жиноятидан чин кўнгилдан пушаймонлиги, муқаддам судланмагани, яшаш ва иш жойидан ижобий тавсифлангани, оилавий шароити, оилада ягона боқувчи экани каби ҳолатларга ҳам эътибор қаратилди», – дейди Жиноят ишлари бўйича Чилонзор тумани суди судьяси Сарвар Орипов.
Жиноят кодексининг бир неча моддалари билан айланган бу шахсларга ойлик иш ҳақининг маълум қисмини давлат даромади ҳисобига ушлаб қолган ҳолда бир неча йил ахлоқ тузатиш ишлари, 5 йилдан зиёдроқ озодликдан маҳрум қилиш жазосини ўташи керак эди. Лекин Жиноят кодексининг 72-моддаси қўлланилиб, тайинланган жазо шартли, деб ҳисобланди ва уларга 3 йил синов муддати белгиланган.
Изоҳ (0)