Toshkent shahri Chilonzordagi “Shuhrat” chorrahasida firibgar shaxs qo‘lga olindi. Bu haqda O‘zA xabar berdi.
“Shuhrat” chorrahasi joylashuv nuqtasi har tomonlama qulay bo‘lgani uchun o‘ziga yarasha shuhrat topgan. Biroq, bu chorrahaning jinoyatlar uyasi sifatida “shuhrat” topayotgani achinarli.
Avval bu chorrahada giyohvand moddalar “qora” bozori mavjudligi, o‘tgan yilda bunga barham berish uchun bu yerda 66 marotaba tezkor tadbir o‘tkazilgan. Tadbirlarda 341 nafar huquqbuzar shaxsga nisbatan tegishli tartibda choralar ko‘rilib, tarkibida psixofaol moddalari bo‘lgan 41 mingga yaqin “Tramadol” va 268 dona “Lirika” dori preparati daliliy ashyo sifatida olingan.
Yana bir holatda “Shuhrat” chorrahasi “pora berish” jinoyatiga “guvoh” bo‘ldi. Navbatdagi bu jinoyat firibgarlik bilan bog‘liq.
Koreyada ishlash orzusidagi ikki yigit o‘quv kursida koreys tilini o‘rganish bilan band edi. Lekin ular ta’lim berayotgan o‘qituvchi bilan o‘zaro suhbatda katta maoshli ish topish mumkin bo‘lgan bu davlatga borish uchun til bilishning o‘zi kifoya emasligi “ayon” bo‘lgan. Ustozi esa gapni cho‘zib o‘tirmay, “bu ish 9 ming dollarga bitadi”, — degan.
Bu shaxs “Fast and easy” nodavlat ta’lim muassasasi rahbari M.R. bo‘lib, bu ishni yolg‘iz o‘zi qilolmasligi, balki “Hoy fast and easy” nodavlat ta’lim muassasasining rahbari B.S. bilan birga, uning yuqori tashkilotda ishlovchi tanishlari orqali bitirishini aytadi.
Koreyaga borish istagidagi yigitlar qarz-u havolalar evaziga biri 4,5 ming, yana biri 3,3 ming dollar topgan.
Buni eshitgan M.R. pulni Toshkent shahar Chilonzor tumanidan o‘tuvchi Kichik xalqa yo‘lida joylashgan “Shuhrat” chorrahasiga olib kelishlarini aytgan. Ikki yigitdan 7,8 ming dollar olib, uni shaxsiy manfaatlari yo‘lida ishlatmoqchi bo‘lgan.
Ayni shu holatga huquqni muhofaza qiluvchi organlarining aralashuvi unga halaqit bergan. M.R. ulardan qutulish uchun sherigini sotgan.
Shu tariqa o‘zgalar mablag‘ini firibgarlik yo‘li bilan qo‘lga kiritishga uringan bu ikki shaxsning ishi sudga oshirilgan.
“Mazkur jinoyat ishini ko‘rib chiqishda, sudlanuvchilarning bu jinoyatni g‘arazli niyatlarda sodir etgani jazoni og‘irlashtiruvchi holat, deb baholandi. Ularning aybiga to‘liq iqrorligi, sodir qilgan jinoyatidan chin ko‘ngildan pushaymonligi, muqaddam sudlanmagani, yashash va ish joyidan ijobiy tavsiflangani, oilaviy sharoiti, oilada yagona boquvchi ekani kabi holatlarga ham e’tibor qaratildi”, – deydi Jinoyat ishlari bo‘yicha Chilonzor tumani sudi sudyasi Sarvar Oripov.
Jinoyat kodeksining bir necha moddalari bilan aylangan bu shaxslarga oylik ish haqining ma’lum qismini davlat daromadi hisobiga ushlab qolgan holda bir necha yil axloq tuzatish ishlari, 5 yildan ziyodroq ozodlikdan mahrum qilish jazosini o‘tashi kerak edi. Lekin Jinoyat kodeksining 72-moddasi qo‘llanilib, tayinlangan jazo shartli, deb hisoblandi va ularga 3 yil sinov muddati belgilangan.
Izoh (0)