Бухорода одам саломатлиги учун хавфли ёғ ишлаб чиқариш яширин цехи фош этилди
Ғиждувон туманидаги «Сармижон» маҳалла фуқаролар йиғинида инсон ҳаёти учун хавфли ёғ ишлаб чиқарадиган яширин цех фаолияти фош этилди. Бош прокуратура ҳузуридаги иқтисодий жиноятларга қарши курашиш Депортаменти туман бўлими ҳамда туман Ички ишлар органлари фаолиятини мувофиқлаштириш бошқармаси томонидан ўтказилган тезкор тадбирда ушбу цехнинг 1999 йилда туғилган Нуриддин Бобоқулов (исми шарифи ўзгартирилган) томонидан ишга туширилгани аниқланган.
Бухоро вилоят ИИБ матбуот хизмати раҳбари, майор Қувват Ярашовнинг «Дарё»га маълум қилишича, Нуриддин Бобоқулов ўзи яшайдиган хонадон ёрдамчи хўжалигида қўлбола мойжувоз ўрнатиб, лаборатория назоратидан ўтмаган, истеъмол учун мутлақо яроқсиз пахта ёғи ишлаб чиқариш ва муомалага киритиш фаолияти билан шуғулланиб келган.
Нуриддин Бобоқулов жорий йилнинг 11 февраль куни иш устида ушланган. 144 кг пахта чигити, 35 литр ўсимлик ёғи, 266 кг кунжара маҳсулоти, антисанитар аҳволдаги пластмасса идишлар ҳамда қўлбола усулда ясалган мойжувоз ускунаси, шунингдек, бошқа темир жиҳозлар ашёвий далил сифатида олинган.
Ғиждувон туман давлат санитария эпидемиология назорати марказининг хулосасида қўлбола мойжувозда ишлаб чиқарилган ёғнинг инсон саломатлиги хавфсизлиги талабларига жавоб бермаслиги кўрсатилган.
Ушбу ҳолат юзасидан Нуриддин Бобоқуловга нисбатан Ўзбекистон Республикаси ЖКнинг 186-2-моддаси 1-қисми (Чигитдан олинадиган маҳсулотни қонунга хилоф равишда ишлаб чиқариш ёки муомалага киритиш) билан жиноят иши қўзғатилган. Ушбу модда билан айбдор деб топилган шахс учун энг енгил жазо ЭКИҲнинг 100 баравари миқдоридаги жарима, энг оғир жазо уч йилгача озодликдан маҳрум этиш бўлиши мумкин.
