Олий Мажлис депутати: Фуқаролар йиғини раисларини тайинлаш амалиётига йўл қўйган чекка ҳудуд мутасаддиларига чора кўриш керак

14 февраль куни Қашқадарё вилоят ҳокимлигида бўлиб ўтган йиғилишда «Фуқаролар йиғинлари раислари (оқсоқоллари) сайлови тўғрисида»ги Ўзбекистон Республикасининг 2018 йил 15 октябрда қабул қилинган Қонуни мазмун моҳияти хусусида сўз борди.

Йиғилишда иштирок этган Олий Мажлис депутати Турсунпўлат Норбоев янги қабул қилинган қонун эски қонундан тубдан фарқ қилиши ҳақида гапириб ўтар экан, ўзгаришларга кўра эндиликда фуқаролар йиғини раислари 3 йил муддатга сайланиши ҳақида тўхталиб ўтди.

«Раис ваколатининг 2,5 йилдан 3 йилга узайтирилиши бу раиснинг ўз имкониятларини тўлақонли кўрсатиб беришига имкон яратади, — дейди Олий Мажлис депутати. – Қолаверса асосий ўзгаришлардан яна бири бу — раис ва маслаҳатчиларни энди бир вақтда сайламаслигимиздир. Аввал раис сайлаб олинади, кейин эса раисга ўз жамоасини шакллантиришга имкон берилади.

Тадбирда сўз олган вилоят ҳокими ўринбосари Долли Аллаев ҳамда сенатор Исломиддин Аброров журналистлар янги қонун мазмун-моҳиятини тўла англаб етгандагина сайлов жараёнларини ҳаққоний ёрита олиши ҳақида гапириб ўтди.

Депутат Турсунпўлат Норбоев журналистларнинг саволларига жавоб берар экан, чекка-чекка ҳудудларда ҳалигача фуқаролар йиғини раисларини тайинлаб қўйиш амалиёти давом этаётганини бунда эса жамоатчилик хусусан оммавий ахборот воситларининг фаолияти қониқарсиз даражада эканлигини таъкидлади.

«Дарё» мухбири йиғилишда иштирок этган мутасаддиларга Деҳқонобод туманида айнан шундай ҳолат кузатилганини, мазкур ҳолат «Дарё» таҳририяти томонидан батафсил ўрганилиб, ёритилган бўлса-да масъуллар ҳалигача сукут сақлашаётганининг сабаби хусусида сўради. Саволга жавобан Олий Мажлис депутати Турсунпўлат Норбоев ушбу ҳолатга йўл қўйган мутасаддиларга нисбатан чора кўриш лозимлиги ва «Дарё» таҳририятида кўтарилган масалага тез орада жавоб қайтариш кераклигини айтди.

Йиғилишда шунингдек, келажакда фуқаролар йиғини раисларининг зиммасига юклатилаётган ортиқча вазифалардан уларни озод қилиш, раисларнинг ойлик маошини уч бараварга ошириш, бир йилда бир маротаба дам олиш оромгоҳларида дам олиши имкониятини яратиш, уларнинг ҳам касб байрамларини белгилаш кераклиги хусусидаги таклифлар илгари сурилаётганлиги айтиб ўтилди.