G‘ijduvon tumanidagi “Sarmijon” mahalla fuqarolar yig‘inida inson hayoti uchun xavfli yog‘ ishlab chiqaradigan yashirin sex faoliyati fosh etildi. Bosh prokuratura huzuridagi iqtisodiy jinoyatlarga qarshi kurashish Deportamenti tuman bo‘limi hamda tuman Ichki ishlar organlari faoliyatini muvofiqlashtirish boshqarmasi tomonidan o‘tkazilgan tezkor tadbirda ushbu sexning 1999-yilda tug‘ilgan Nuriddin Boboqulov (ismi sharifi o‘zgartirilgan) tomonidan ishga tushirilgani aniqlangan.
Buxoro viloyat IIB matbuot xizmati rahbari, mayor Quvvat Yarashovning “Daryo”ga ma’lum qilishicha, Nuriddin Boboqulov o‘zi yashaydigan xonadon yordamchi xo‘jaligida qo‘lbola moyjuvoz o‘rnatib, laboratoriya nazoratidan o‘tmagan, iste’mol uchun mutlaqo yaroqsiz paxta yog‘i ishlab chiqarish va muomalaga kiritish faoliyati bilan shug‘ullanib kelgan.
Nuriddin Boboqulov joriy yilning 11-fevral kuni ish ustida ushlangan. 144 kg paxta chigiti, 35 litr o‘simlik yog‘i, 266 kg kunjara mahsuloti, antisanitar ahvoldagi plastmassa idishlar hamda qo‘lbola usulda yasalgan moyjuvoz uskunasi, shuningdek, boshqa temir jihozlar ashyoviy dalil sifatida olingan.
G‘ijduvon tuman davlat sanitariya epidemiologiya nazorati markazining xulosasida qo‘lbola moyjuvozda ishlab chiqarilgan yog‘ning inson salomatligi xavfsizligi talablariga javob bermasligi ko‘rsatilgan.
Ushbu holat yuzasidan Nuriddin Boboqulovga nisbatan O‘zbekiston Respublikasi JKning 186-2-moddasi 1-qismi (Chigitdan olinadigan mahsulotni qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilgan. Ushbu modda bilan aybdor deb topilgan shaxs uchun eng yengil jazo EKIHning 100 baravari miqdoridagi jarima, eng og‘ir jazo uch yilgacha ozodlikdan mahrum etish bo‘lishi mumkin.
Izoh (0)