Япония Жанубий Кореядан император ҳақида айтилган сўзлар учун кечирим сўрашни талаб қилди

Токио Жанубий Корея Миллий мажлиси (Парламенти) Спикери Мун Хи Саннинг япониялик император Акихито ҳақидаги баёнотлари сабабли Сеулга норозилик билдирган, дея хабар беради «РБК».

«Ушбу изоҳларни ўқиганимда жуда ҳайрон бўлдим», — дейди Бош вазир Синдзо Абэ. — Мамлакатимиз дарҳол Жанубий Кореяга дипломатик каналлар орқали спикер Мун Хи Саннинг баёноти жуда ноўрин эканлигини етказган. Биз қатъий эътироз билдирдик ва кечирим сўрашни талаб қилдик».

12 февраль куни Жанубий Корея парламенти спикери Bloomberg’га берган интервьюсида Япония императорини япон қўшинларида мажбуран ишлайдиган корейс аёлларидан шахсан кечирим сўрашга чақирган. Мун Хи Саннинг сўзларига кўра, агар Япония бош вазири ёки императори кечирим сўраса, муаммо ҳал бўлади. Шу билан бирга, Жанубий Корея парламентининг спикери аввалги император Хирохитога ишора қилиб, Акихитони «ҳарбий жиноятларнинг асосий айбдорининг ўғли» деб атади.

Иккинчи жаҳон уруши пайтида Япония аскарлари мамлакат армияси бўлган деярли барча ҳудудларда, хусусан, Жанубий Корея, Хитой, Филиппин, Бирма, Таиланд, Вьетнам, Индонезия ва қатор бошқа давлатларда аёлларни қулликка олган. Зўравонлик қурбонлари 20 мингдан 360—410 минггача кишини ташкил қилган бўлиши мумкин.