Ўзбекистон Республикаси Инвестициялар ва ташқи савдо вазири ўринбосари Бадриддин Абидов Грузия Ташқи ишлар вазирининг ўринбосари Александр Хвтисиашвили билан учрашди. Бу ҳақда Инвестициялар ва ташқи савдо вазирлиги PR маркази хабар берди.
Грузия ва Ўзбекистон ташқи ташқи сиёсий идоралари ўртасидаги сиёсий маслаҳатлашувларнинг 11-раунди доирасида икки томонлама савдо-иқтисодий, инвестициявий ҳамда туризм соҳасидаги ҳамкорликнинг бугунги ҳолати ва истиқболларининг долзарб масалалари бўйича ўзбек-грузин музокаралари бўлиб ўтди.
Суҳбат давомида томонлар 2018 йилда мамлакатлар ўртасидаги товар айирбошлаш ҳажмининг ўсмаганлиги, хусусан, пахта толасини етказиб бериш ҳажмининг камайиши ҳисобига экспортнинг пасайиши кузатилганини қайд этди.
Шу билан бирга, ўзаро манфаатли ҳамкорлик, жумладан, Грузия иштирокидаги воситачилик савдосини ривожлантириш бўйича ва эркин савдо зонасида (Хитой, Гонконг, Туркия, МДҲ давлатлари) бир қатор ривожланган давлатлар учун улкан салоҳият мавжудлиги айтиб ўтилди.
«Ҳозирги вақтда Грузияда транспорт инфратузилмаси, хусусан, аэропортлар, йўлларни қуриш ва қайта таъмирлаш бўйича ишлар жадаллик билан ривожланмоқда. Биринчи чуқур сув портини қуриш лойиҳаси бугунги кунда қўшни мамлакатларга юк тушириш ва тўхтаб туришга имкон берадиган катта кемаларга йўл очади. Шу билан бирга, асосий порт Европа ва Осиё мамлакатларига юкларни ташиш учун кенг транзит имкониятларини яратади» — дейди Александр Хвтисиашвили.
Грузия томони Ўзбекистонда амалга оширилаётган кенг кўламли ижтимоий-иқтисодий ислоҳотлар билан қизиқиб бораётганини ва иқтисодий ислоҳотларни амалга оширишга, шу жумладан, Ўзбекистоннинг Жаҳон савдо ташкилотига аъзо бўлишига ўз ҳиссасини қўшишга тайёр эканини таъкидлади.
Томонлар кун тартибидаги масалалар юзасидан, хусусан, тўғридан-тўғри хорижий инвестицияларни жалб қилиш йўли билан қишлоқ хўжалиги, туризм, гидроенергетика, транспорт, енгил саноат ва фармацевтика соҳаларидаги ҳамкорликни янада ривожлантириш истиқболларини муҳокама қилган ҳолда, икки мамлакатнинг тўқимачилик ва тикувчилик корхоналари иштирокида бизнес-форум ташкил этишни таклиф этишди, шунингдек, жорий йилнинг октябр ойида Тбилисидаги Буюк ипак йўли форумида ўзбек вакилларининг иштирокини таъминлашни келишиб олди.
Изоҳ (0)