O‘zbekiston Respublikasi Investitsiyalar va tashqi savdo vaziri o‘rinbosari Badriddin Abidov Gruziya Tashqi ishlar vazirining o‘rinbosari Aleksandr Xvtisiashvili bilan uchrashdi. Bu haqda Investitsiyalar va tashqi savdo vazirligi PR markazi xabar berdi.
Gruziya va O‘zbekiston tashqi tashqi siyosiy idoralari o‘rtasidagi siyosiy maslahatlashuvlarning 11-raundi doirasida ikki tomonlama savdo-iqtisodiy, investitsiyaviy hamda turizm sohasidagi hamkorlikning bugungi holati va istiqbollarining dolzarb masalalari bo‘yicha o‘zbek-gruzin muzokaralari bo‘lib o‘tdi.
Suhbat davomida tomonlar 2018-yilda mamlakatlar o‘rtasidagi tovar ayirboshlash hajmining o‘smaganligi, xususan, paxta tolasini yetkazib berish hajmining kamayishi hisobiga eksportning pasayishi kuzatilganini qayd etdi.
Shu bilan birga, o‘zaro manfaatli hamkorlik, jumladan, Gruziya ishtirokidagi vositachilik savdosini rivojlantirish bo‘yicha va erkin savdo zonasida (Xitoy, Gonkong, Turkiya, MDH davlatlari) bir qator rivojlangan davlatlar uchun ulkan salohiyat mavjudligi aytib o‘tildi.
“Hozirgi vaqtda Gruziyada transport infratuzilmasi, xususan, aeroportlar, yo‘llarni qurish va qayta ta’mirlash bo‘yicha ishlar jadallik bilan rivojlanmoqda. Birinchi chuqur suv portini qurish loyihasi bugungi kunda qo‘shni mamlakatlarga yuk tushirish va to‘xtab turishga imkon beradigan katta kemalarga yo‘l ochadi. Shu bilan birga, asosiy port Yevropa va Osiyo mamlakatlariga yuklarni tashish uchun keng tranzit imkoniyatlarini yaratadi” — deydi Aleksandr Xvtisiashvili.
Gruziya tomoni O‘zbekistonda amalga oshirilayotgan keng ko‘lamli ijtimoiy-iqtisodiy islohotlar bilan qiziqib borayotganini va iqtisodiy islohotlarni amalga oshirishga, shu jumladan, O‘zbekistonning Jahon savdo tashkilotiga a’zo bo‘lishiga o‘z hissasini qo‘shishga tayyor ekanini ta’kidladi.
Tomonlar kun tartibidagi masalalar yuzasidan, xususan, to‘g‘ridan-to‘g‘ri xorijiy investitsiyalarni jalb qilish yo‘li bilan qishloq xo‘jaligi, turizm, gidroyenergetika, transport, yengil sanoat va farmatsevtika sohalaridagi hamkorlikni yanada rivojlantirish istiqbollarini muhokama qilgan holda, ikki mamlakatning to‘qimachilik va tikuvchilik korxonalari ishtirokida biznes-forum tashkil etishni taklif etishdi, shuningdek, joriy yilning oktyabr oyida Tbilisidagi Buyuk ipak yo‘li forumida o‘zbek vakillarining ishtirokini ta’minlashni kelishib oldi.
Izoh (0)