10—11 декабрь кунлари Тошкентда «Ўзбекистон маданий мероси жаҳон тўпламларида» лойиҳасининг 2018 йил якунлари ва «Йўл харитаси-2019»ни ишлаб чиқишга бағишланган халқаро мультимедиа форуми бўлиб ўтади. Бу ҳақда «Дарё»га ЎзЭОАВМА матбуот хизмати маълум қилди.
«NAESMI Media Hall»да («Зарафшон» концерт зали) бўлиб ўтадиган форум илмий ва маданий қисмлардан иборат. Унда олимлар ўз натижалари ва шов-шувли топилмалари ҳақида сўзлаб беради. Жумладан, тарих фанлари доктори, санкт-петербурглик Эфим Резван Ўзбекистон ҳудудига тегишли дунёнинг 114 та Қуръони ҳақида қизиқарли маълумотлар билан ўртоқлашади. Марказий Осиё ва Кавказ институти раиси Фредерик Старр китоб нашриётида кенгайтирилган воқеликни қандай қўллаш мумкинлиги ҳақида сўзлаб беради. Ўзбек олимларининг ўтмишда кичик нашрларда чоп этилган, натижада кенг доирадаги китобхонларнинг фойдаланишига имконият бермаган қимматли илмий асарларини қайта нашр этиш лойиҳаси тақдим этилади.
Ушбу туркумнинг биринчи китоби – Э. Ртвеладзенинг «Буюк Ҳинд йўли», «Ўзбекистоннинг 100 машҳур қўлёзма ёдгорликлари» лойиҳаси, Шарафаддин Яздийнинг «Зафарнома» («Ғалабалар китоби») асари факсимилеси тақдимоти форумнинг муҳим қисмига айланади. «Россия – Культура» телеканалининг ЎзЭОАВМА билан биргаликдаги «Ўзбекистон. Севги ҳақида афсоналар» тўрт серияли ҳужжатли фильми, шунингдек Германия кинокомпанияси томонидан «Ўзбекистоннинг буюк файласуфлари» фильмини суратга олиш бўйича лойиҳанинг ревюси ўтказилади.
Тадбир доирасида «Замонавий дунёдаги маданий мерос: сақлаш ва оммалаштириш» мавзусидаги илмий-амалий конференция ҳамда Темурийлар тарихи давлат музейида «Ўзбекистон маданий мероси жаҳон тўпламларида» лойиҳаси доимий кўргазмасининг очилиш маросими бўлиб ўтади.
Форумнинг маданий дастурини Ўзбекистоннинг тарихий-маданий меросини оммалаштириш ва туристик салоҳиятини оширишга йўналтирилган «Х ижтимоий медиа-маҳсулотлар миллий фестивали» давом эттиради.
Шунингдек, тадбирлар доирасида жорий йилда нашрга тайёрланган 10 та альбом тақдимоти режалаштирилган.
Бундан ташқари, интерактив ҳудудда Ўзбекистонда биринчи марта илмий-маданий соҳада 3D технологияси тақдимоти бўлиб ўтади.
Икки кун давом этадиган форум натижалари бўйича Ўзбекистоннинг маданий меросини ўрганиш, сақлаш ва оммалаштириш бўйича Бутунжаҳон жамияти фаолиятининг 2019 йил учун йўл харитаси ишлаб чиқилади.
Тадбир ташкилотчилари – Ўзбекистон электрон оммавий ахборот воситалари миллий ассоциацияси (ЎзЭОАВМА), Олий Мажлис ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фондининг маблағларини бошқариш бўйича парламент комиссияси, Туризмни ривожлантириш қўмитаси, Ўзбекистон ёшлар иттифоқи, Фанлар академияси, Ўзбекистонга оид хориждаги маданий бойликларни тадқиқ этиш маркази, Вазирлар Маҳкамаси ҳузуридаги Ислом цивилизацияси маркази, Ўзбекистон Республикаси Маданият вазирлиги ва ЮНЕСКОнинг Ўзбекистондаги ваколатхонаси.
Изоҳ (0)