Қашқадарёда уяли алоқа операторига террорчилар қўлида эканлиги ҳақида SMS ёзган йигит қўлга олинди

Қашқадарё вилояти Чироқчи туманида яшовчи Т.Й. таниши орқали телефонига Paynet’дан пул ташлаттиради, деб ёзади «Қашқадарё» газетаси.

Бироқ унга ҳисоби тўлдирилгани ҳақида SMS келмайди. Шунда у «Билайн» уяли алоқа компанияси оператор рақамига «Шу номерни текшириб беринг», «Телефон қилинг, саволим бор», «Жавоб беринг», «Пул тушмаяпти, нимага уланган бўлса ўчириб беринглар?» деган мазмунда хабарлар ёзади.

Оператор унинг SMS’ларига жавоб қайтармайди.

«Бундан жаҳли чиққан Т.Й. алоқа компанияси эътиборини тортишнинг бошқа йўлини топади. Шунда у операторга ‘Ёрдам. террористлар қўлидаман’ деб SMS жўнатади. Билмайдики, бу билан бошқа идора эътиборини ҳам тортганини. Йигит бояқиш ёлғон хабар йўллагани учун қўлга олинди», — дейилади хабарда.