Ҳаж зиёратига навбатсиз кетиш илинжида бўлган фуқаролар орасида қамоқ жазосидан қайтганларни иш билан таъминлаётганлар ҳам бор. Шунингдек, диний экстремизм билан қамалиб озодликка чиққан фуқароларнинг ҳар бири билан шахсан учрашиб уларга доимий равишда ёрдам кўрсатиб келинмоқда. Бу ҳақда Тошкент шаҳар ҳокимлиги матбуот хизмати хабар берди.
«Ўзбекистонда Президент ташаббуси билан Жиноят кодексининг 159-моддаси билан жазони ўташ муддатларидан қайтган фуқароларга ёрдам кўрсатишнинг қулай кўриниши йўлга қўйилди», —Тошкент шаҳар ҳокимининг жамоат ва диний ташкилотлар билан алоқалар бўйича ўринбосари Шуҳрат Турдиқулов.
«Шерзод 7 йил озодликдан маҳрум этилган эди. У бу йиллар давомида ўқишдан ажралди, бир касбнинг бошини тута олмади. У йўлидан адашиб диний оқимларга қўшилиб қолган пайтида Ўзбекистоннинг нуфузли университетда таҳсил олар эди. Тошкент шаҳар ҳокимлигининг жамоат ва диний ташкилотлар билан алоқалар бўлими тавсияси ва ёрдами билан Шерзоднинг Жаҳон иқтисодиёти ва дипломатия университетида ўқиши тикланди. Унинг 22 миллион сўм миқдоридаги шартнома пулини Ҳаж сафарига бир неча йиллардан буён навбат кутаётган кекса ёшли фуқаролардан бири тўлаб берди.
Яна бир собиқ маҳбус Зокир ўтган йили 17 йиллик жазо муддатини ўтаб оиласи даврасига қайтган эди. У бола-чақаси, яқинлари орасида бўлса ҳам неча йиллик умрини зое кетгазгани туфайли на иши ва на бир сармояси бор. Зокирга ҳам йиллар давомида Ҳаж зиёратига боришни орзиқиб кутиб келган кекса фуқароларимиздан бири янги иш бошлаши учун 15 миллион сўм сармоя берди. Зокир 15 миллион сўм билан қуён фермасини очди. Бошида минг ҳадик билан бошлаган иши омади келиб яхши даромад келтира бошлади. Бугун унинг 30 тадан ортиқ зотдор, ҳар бири 2 миллион сўм атрофида баҳоланувчи қуёнлари бор. Даромади эса ўсиб бормоқда», — дейилади хабарда.
Шунингдек, Даврон ака ҳам салкам 19 йил панжара ортида ўтириб, озодликка чиқди. Қамалган вақтида эндигина атак-чечак қилиб юра бошлаган фарзандлари бугун оила қурай демоқда. Ўғилни уйлаш, қизни узатиш керак. Аммо, Даврон аканинг ҳам на ҳунари ва пули бор. Устига устак озодликдан маҳрум бўлган даврида соғлиғи бўйича ҳам муаммолар орттирган эди. Аммо юртимизда яхши одамлар кўп экан Ҳаж зиёрати орзусида бўлган ёши улуғ фуқаролардан бири унга ёрдам қўлини чўзди. Даврон касалхонада ётиб даволанди, ҳайдовчилик курсларида ўқиди. Эндиликда кўзида жарроҳлик операцияларини ўтказилиши кутилмоқда. Жазо муддатларини ўтаб қайтган биргина фуқарони ҳам ҳунарли, ишли бўлиши, соғлиғини тикланиши жамият учун катта фойда. Айниқса, адашиб бизга бегона бўлган ғоялар таъсирига тушиб қолган фуқароларни яна жамиятга қайтишга ёрдам бериш уларни четлатиб қўймаслик жуда муҳим.
Ўзбекистон Президент айнан шундай манфур ғоялар таъсирида жамиятдан узоқлашган кимсаларни қайтариб, уларга тўғри йўлни кўрсатиб, ҳаётда ўз ўрнини топишга ёрдам кўрсатган фуқаролар биринчилардан бўлиб Ҳаж зиёратига боришга лойиқ эканлигини таъкидлаган эди. Бугун бу усул самара бермоқда. Ҳаж зиёрати орзусида навбат кутаётган фуқаролар ноиложликда қолган фуқароларга ёрдам қилмоқда. Жамиятда на иши, на ҳунари ва на пули бўлган норози фуқароларнинг кўпайиши яна жиддийроқ муаммоларни келтириб чиқариши аниқ.
Тошкент шаҳар ҳокимлигининг жамоат ва диний ташкилотлар билан алоқалар мажмуаси томонидан олиб борилаётган ишлар эса ижобий натижа бермоқда. Ёрдам қилганлар ҳам, ундан фойда кўрганлар ҳам миннатдор. Имкон бўлса узоқ муддат қамоқ жазосини ўтаб қайтган фуқароларнинг ҳар бирига шундай ёрдам кўрсатилиши ва уларнинг ўз ҳаёт йўлини тиклашга кўмак бўлиши керак.
Юқорида қайд этилган шахсларнинг исмлари ўзгартирилган.
Изоҳ (0)