Қарши шаҳридаги Шайхали қўрғони «Обод маҳалла» дастурига тушган, деб ёзади «Қашқадарё» газетаси.
Дастурда таъмирга муҳтож 977 та якка тартибдаги уй-жойни, шу билан бирга, 18 та кам таъминланган ва эҳтиёжманд оилалар хонадонларини таъмирлаш белгиланган.
Бироқ бу ишларни аҳоли ўз маблағлари ҳисобидан бажармоқда.
Фақат 2 та кам таъминланган оила хонадонлари ҳомийлар ёрдами билан таъмирлаб берилган. Мисол учун, Н.Файзиева маҳаллада кам таъминланганлар рўйхатида туради. Турмуш ўртоғи бир неча йил илгари Россияга чиқиб кетганича бола-чақасининг ҳолидан бирор марта бўлсин, хабар олмаган.
«Ўз-ўзидан аёл боши билан тўкилиб бораётган уйни таъмирлашга кучи етмаган. ‘Обод маҳалла’ дастури асосида унинг уйини таъмирлаб беришларини эшитиб бошда бир хижолат тортган бўлса, халқимизнинг қийналганга ёрдам қўлини чўзадиган одатидан келиб чиқиб, кўнглининг бир чеккасида мамнунлик туйгани ҳам рост.
Бироқ вақт ўтаётган бўлса-да, на уй таъмирланган, на бу билан биров қизиққан. Маълум бўлишича, мутасаддилар унинг хориждаги эри билан боғланиб, ундан маблағ сўраган ва пулни олиб, уйнинг томини ёпиб берган.
Қандай ҳолатда бўлсин, бир хонадоннинг обод бўлгани яхши, бироқ нега шу ҳақда аввалроқ ўйлаб кўрилмади? Эрни инсофга чақириш чоралари кўрилмади? Эрдан умид бор экан, таъмирни дастурга киритишдан нима мантиқ? Бунинг учун ажратилиши лозим бўлган пул қаерга кетди?», — дейилади хабарда.
Изоҳ (0)