Эрон Kowsar қирувчи самолётларини оммавий ишлаб чиқаришга киришди. Самолёт ишлаб чиқаришни бошлаш маросими давлат телевидениеси орқали намойиш этилди, дея хабар бермоқда Reuters агентлиги.
«Яқин вақт ичида ушбу самолётдан зарур миқдорда ишлаб чиқарамиз ва Ҳарбий-ҳаво кучларига хизмат учун етказиб берамиз», — деди маросимда Эрон мудофаа вазири Амир Ҳотамий.
Аввалроқ Al-Masdar портали Дамашқдаги манбаларга асосланиб, Эрон ўзи ишлаб чиқарган қирувчи самолётлар ва ҳаво ҳужумидан мудофаа воситаларини Сурияга етказиб бермоқчи экани ҳақида хабар берган эди. Манбанинг сўзларига кўра, бунда гап янги Kowsar қирувчи самолёти ҳақида ҳам бормоқда.
Kowsar — тўлиқ Эроннинг ўзида лойиҳалаштирилиб, ишлаб чиқарилган илк қирувчи самолёт. У реактив ҳарбий самолётларнинг тўртинчи авлодига мансуб бўлиб, баллистик ҳисоб-китоблар компьютер тизими ва кўп нишонли радар билан жиҳозланган.
Kowsar илк бор 2018 йил 21 август куни намойиш этилган эди. Ўша тақдимотда мамлакат президенти Ҳасан Руҳоний ҳам иштирок этган.
Изоҳ (0)