Ижтимоий тармоқларда актёр Меҳриддин Раҳматов ўз хонадонида свет кўп ўчаётгани сабаб маиший техниклари куйиб қолаётганини айтган видео тарқалди. Ўзбекистонда хизмат кўрсатган артист ҳолат юзасидан масъуллардан тушунтириш беришни сўраган.
Меҳриддин Раҳматов видеомурожаатида ўзи яшайдиган Олмазор туманидаги кўп қаватли уйда электр токи кетма-кет ўчиб-ёнаётганини таъкидлаган.
“Бунинг орқасидан 1-2 нарсаларимиз куйиб қолди ва куйишда давом этяпти. Кеча кондиционер тузаттирганман. Бугун мана кулер куйиб қолди. Холодилниклар бор бу ёқда. Олмазор тумани электр энергияси тақсимоти ходимларига, мутасаддиларига саволим: нима, сизлар бу ишни атайин қиляпсизларми? Балки, электр энергияни тежаш учун шундай қилаётгандирсизлар? Лекин ўчириб-ёқавериб, бизнинг қанчадан-қанча техникаларимиз ишдан чиқаётганини, халқ қийналаётганини биласизларми? Ёки нима қилайлик? Янгилаб олайликми яна? Нима қилайлик”, деган актёр.
Кейинроқ “Тошкент шаҳар электр тармоқлари” МЧЖ Telegram каналида видео тарқатилди. Тасвирда мурожаатга асосан, корхонанинг Олмазор туман электр таъминоти бошлиғи ва бош муҳандиси Меҳриддин Раҳматов билан учрашгани акс этган.
Суҳбатда ҳаво иссиқлиги сабаб ток босими ортаётгани, ёнғин келиб чиқишини олдини олиш учун свет тез-тез ўчирилаётгани айтилган.
“Электр ўчирилиши тўғрисида олдиндан хабар беришни имкони йўқми”, деб савол берган актёр масъулларга.
“Бизлар йўл-йўриқ қилолмаётганимиз сабаби юкламаларимиз қай пайтда ошиб кетишини аниқ киритолмаяпмиз. Қачонки, талаб ошган пайтда электрни ўчиришга мажбур бўляпмиз. Аҳолига кўп зарар етказиб қўйяпмиз”, дейди “электросет” масъули.
“Свет ўчирилишини олдиндан айтишга ҳаракат қилсанглар яхши бўларди. Ижтимоий тармоқларда огоҳлантириб қўйинг, илтимос”, деган Меҳриддин Раҳматов.
Корхонага кўра, ҳозирда Тошкент шаҳрининг нафақат Олмазор, балки барча ҳудудларида тармоқларни янгилаш, подстанциялар қувватларини ошириш ишлари кетмоқда.
Изоҳ (0)