Малайзия бош вазири Анвар Иброҳим яшаш харажатларининг кўпайиши сабабли аҳолини қўллаб-қувватлаш бўйича янги чора-тадбирларни эълон қилди. Bangkokpost маълумотларига кўра, мамлакатнинг вояга етган фуқаролари 100 ринггит (23,70 АҚШ доллари) миқдорида бир марталик тўлов олади.
Ёрдам дастурининг умумий молиялаштириш ҳажми 2025 йилда 15 миллиард ринггитни ташкил этади, бу дастлаб режалаштирилган 13 миллиард ринггитдан кўпроқдир.
Ушбу чоралар Куала-Лумпурда шанба куни ўтказилиши режалаштирилган оммавий норозилик намойиши арафасида эълон қилинган. Мухолифат ҳукуматни нархлар ўсишини тўхтата олмагани ва ваъда қилинган ислоҳотларни амалга оширмаганлиги учун айблаяпти. Намойишда 10-15 минг атрофида одам иштирок этиши кутилмоқда.
Бош вазир аҳоли учун харажатларни янада камайтириш зарурлигини таъкидлаб, камбағалликка қарши курашиш учун қўшимча тадбирлар кўришни ваъда қилди. Шунингдек, ҳукумат RON95 маркали ёқилғи учун янги субсидия тизимини тақдим этади, бу эса бензин нархини бир литр учун тахминан 1,99 ринггитгача туширади.
Экспертларнинг фикрича, бундай қадамлар ички талабни қўллаб-қувватлаш учун зарур, бироқ улар мамлакат бюджетига қўшимча босим ўтказади. Иқтисодчилар огоҳлантиришича, ёқилғи субсидиялари ислоҳотининг кечикиши ҳукуматнинг 2028 йилгача бюджет тақчиллигини ялпи ички маҳсулотнинг 3 фоизигача камайтириш мақсадига эришишига тўсқинлик қилиши мумкин.
Изоҳ (0)