Рўйхатда кўплаб жангчиларга тарихда ўз ўринларини, баъзиларига карьераларини, кўпчиликка эса яхшироқ бўлиш имкониятларини қимматга туширган хатолар келтирилган. Шунингдек, MMA тарихига катта таъсир кўрсатган бир нечта промоутерларнинг хатолари ҳам ушбу мақоладан жой олган.
10. Жесси Тейлор UFC’да иштирок этиш имкониятидан маҳрум бўлган
Эҳтимол, бу кимгадир ғалати туюлар. Кўпчилик Жесси Тейлорнинг кимлигини умуман билмайди. Бироқ, TUF’нинг “Тавба” деб номланган 25-мавсумида айтиб берилган унинг ҳикояси жуда ҳайратланарли. Унда бир вақтлар UFC’да иштирок этган ёки бунга яқин бўлган, аммо имкониятни бой берган жангчилар ўзаро куч синашган. Жесси Тейлорнинг ҳикояси энг драматик эди. У TUF’нинг еттинчи мавсумида қатнашиб, финалга чиқишга муваффақ бўлган. Бироқ сал олдинроқ меҳмонхонада маст-аласт ҳолда жанжал кўтарган. Охир-оқибат шахсан Дана Уайтнинг ўзи уни промоушендан ҳайдаб юборган.
Тейлор TUF’га қайтиш имкониятига эга бўлгунга қадар узоқ вақт промоушенларда сарсон бўлган. У яна финалга чиққан ва ҳатто унда Диэго Лима устидан ғалаба қозонган, аммо UFC’да қатнашиш унга насиб этмаган. Тейлор допинг билан қўлга тушиб, бу унинг TUF’даги ғалабасига ҳам соя солган эди. Шундан сўнг у кам танилган промоушенларда иштирок этишни бошлаган. Ишонч билан айтиш мумкинки, унинг UFC’да жанг қилиш орзуси амалга ошмайди.
9. Алистар Оверим хатога йўл қўйди
2016 йилда Алистар Оверим ниҳоят UFC чемпионлиги учун жанг қилиш имкониятига эга бўлди. У промоушенда дебют қилганидан бошлаб беш йил давомида бу мақсад сари интилган. У чўққига кўтарилишдан олдин жанг услубини бутунлай ўзгартириши ва бир нечта оғриқли мағлубиятларни бошдан кечиришига тўғри келган. У ерда уни эндигина камарни қўлга киритган Стипе Миочич кутиб турарди. Оверимни тақдирнинг ўзи унвонга олиб бораётгандек туюларди. Жангнинг бошланиши у учун идеал бўлди. У Миочични тутиб олиб, уни нокаутга учратишга муваффақ бўлди. Ва шу лаҳзада у фаолиятидаги энг ёмон қарорни қабул қилди. Ҳайратда қолган рақибига зарба бериш ўрнига, у негадир унга “гилотина” ўтказишга қарор қилди. Натижада, Миочич ўзини тиклашга, қутулиб чиқишга ва бир неча дақиқадан сўнг Оверимни нокаутга учратишга муваффақ бўлди. Шундай қилиб, битта нотўғри қарор Алистарни, эҳтимол, барча даврларнинг энг яхши оғир вазнли жангчиси мақомини олиш имкониятидан маҳрум қилган.
8. Майкл Чендлер ўзини “қўзғолончи” деб ўйлади
Майкл Чендлер Беллаторъга “стойка”да яхши туришни ўрганган курашчи сифатида келган. У ўзининг энг муҳим ғалабаларини кураш ва зарбани аралаштириб қўлга киритган. Аммо UFC’га ўтгач, негадир курашдан воз кечиб, фақат “стойка”да ишлашга қарор қилган. Бу UFC таснифидаги учинчи жангда Жастин Гетжи билан тўқнаш келганда яққол намоён бўлди. Мутлақо барча мутахассислар, агар Чендлер курашдан фойдаланса, ғалаба қозониш учун барча имкониятларга эга, деб ҳисоблашган. Лекин Майкл ўзининг энг кучли томонини бутунлай унутиб қўйди ва “стойка”да вазн бўйича энг яхши зарба берувчилардан бири билан жанг қила бошлади. У ёрқин жанг ўтказди ва мухлислар меҳрини қозонди, аммо бунинг эвазига мағлубият таъмини татиб кўрди.
Кейинчалик, Чендлер бошқа бир услубни ривожлантиришни бошлади. У Тони Фергюсон, Дастин Порье ва Чарльз Оливейра билан жанг қилишга қарор қилди. Албатта, бу яхшиликка олиб келмади. Chendler билан боғлиқ вазиятда яна бир ғалати қарорни эслатиб ўтмаслик мумкин эмас. 2023 йилда у Конор Макгрегор билан жанг қилиши ҳақида миш-мишлар тарқалди. Уларнинг қарама-қаршилигини очиш учун улар TUF мавсумини ўтказишди, унда Чендлер ва Конор мураббийлик қилди. Чендлер бошқа жангларни қабул қилмади ва икки йил давомида фаол тайёргарлик кўрди. Қайсидир паллада жанг расман белгиланган ҳам эди, бироқ сўнгги паллада Конор туфайли бекор қилинди. Афтидан, Макгрегор октагонга чиқишни хаёлига ҳам келтирмаган ва фақат ўз шахси атрофидаги шовқин-суронни кучайтирган. Қандай бўлмасин, Чендлернинг бу жангга бўлган иштиёқи унинг икки йиллик карьерасига таъсир кўрсатган ва уни Хатико билан таққосланган мем қаҳрамонига айлантирган.
7. Беллатор UFC фахрийларига пул тикмоқда
Қайсидир нуқтада Беллатор UFC билан рақобат қилишга қатъий қарор қилди. Аммо бунинг учун улар жуда ғалати қадамлар қўя бошладилар. Улар ўз юлдузларини етиштириш ўрнига (гарчи бунга ҳам эътибор қаратилган бўлса-да), UFC фахрийларига катта гонорарлар тўлай бошладилар. Шундай қилиб, Беллаторъда Чак Лиделл, Вандерлей Сильва, Чел Соннен, Бен Ҳендерсон ва Квинтон Жексон пайдо бўлди. Ҳатто иккаласини ёшини қўшганда 100 дан ошадиган Ройс Грэйси ва Кен Шемрок ҳам бу рўйхатда бор эди. Табиийки, бундай юлдузларнинг пайдо бўлиши қисқа муддатли қизиқишни уйғота олди, аммо у тезда сўнди.
Фақат Беллатор фахрийларга тўлаши керак бўлган катта гонорарлар қолган. Буларнинг барчаси зарарга олиб келди. Самара учун курашиш ўрнига, Беллатор “ҳайп”га пул тикди. Кўп ўтмай Скотт Кокер ва раҳбариятнинг бошқа аъзолари ўз хатоларини тушуниб етишди ва “фахрийлар”ни эмас, балки Райан Бейдер ва Фил Дэвис каби ҳали ҳам қобилиятли жангчиларни жалб қила бошлашди, аммо бу ҳам промоушеннинг UFC’га яқинлашишига ёрдам бермади. Стратегияни танлашда раҳбарият томонидан йўл қўйилган хатолар катта йўқотишларга олиб келди, бу эса Viacom компаниясини промоушен билан ҳамкорлик қилишдан воз кечишга ундади. Натижада, Беллатор ПФЛга сотилди ва унинг энг яхши жангчилари аста-секин UFC’га ўтмоқда.
6. Дана Уайт Лиделлни Pride’нинг энг яхши жангчиларига қарши қўйишга қарор қилди
2003 йилда, Япония промоушени билан рақобатнинг энг юқори чўққисида Дана Уайт ўз жангчисини Pride ярим оғир вазн тоифаси Гран-присида эълон қилишга қарор қилди. Бу жуда қалтис қадам эди. Унинг мақсади UFC жангчилари Приде жангчиларидан устун эканлигини ҳаммага исботлаш эди. Дана Уайт “гладиатор” сифатида ўша пайтда UFC’нинг энг кучли ярим оғир вазн тоифаси вакилларидан бири бўлган Чак Лиделлни танлади. Уайт Лиделл финалга чиқишига ва рақибларнинг асосий юлдузи — Вандерлей Сильвани мағлуб этишига умид қилган.
Воқелик Уайтга ҳам, UFC’га ҳам қаттиқ таъсир қилди. Гран-при чорак финалида Лиделл ёш ва тажрибасиз Алистар Оверимни катта қийинчилик билан мағлуб этишга муваффақ бўлди. Ярим финалда эса уни Квинтон Жексон кутиб турганди. Дананинг умидларига қарши ўлароқ, Жексон Лиделлни мағлуб этди. Бу UFC’нинг обрўсига жиддий путур етказди ва промоушен ўзини тиклаб олишига узоқ вақт кетди. Лиделлнинг чиқиши энг яхши жангчилар Японияда қатнашаётганини инкор этмади, балки тасдиқлади.
5. Фаолиятини ўз вақтида якунламаган жангчилар
Андерсон Сильванинг UFC’даги кетма-кет 16 та ғалабасини ҳамма эслайди, аммо фаолиятининг охирида 7 та мағлубият эса умуман унутилмайди. Бу Рашад Эванс ва Жонни Хендрикс каби юлдузларга ҳам тегишли, эътироф этилган “мағлубият чемпионлари” Тони Фергюсон ва Би Же Пенни ҳақида гапирмаса ҳам бўлади. Бу йигитларнинг барчаси тўхташ керак бўлган пайтни ҳис қилмади, натижада кўпчилик уларни ғолиб эмас, балки мағлуб сифатида эслаб қоладиган бўлди.
4. Фёдор Емеляненко жамоаси UFC таклифини рад этган
2009 йилда Кюросао оролида томонлар учрашуви бўлиб ўтди, унда Фёдор ва UFC ўртасидаги ҳамкорлик тақдири ҳал қилиниши керак эди. Дана Уайт учрашувни шундай таърифлаган:
— Мен қаердалигини тушуниб бўлмайдиган аллақандай оролга учиб кетдим. Айтганларини бажардим. Улар нимани хоҳлашса, шуни. Мен бу жанг (Фёдор билан Леснар ўртасида) бўлиши учун ҳамма нарсани қилдим. Мен мухлислар кўришни истаган жангни ташкил этишга ҳаракат қилдим, аммо улар (Емеляненко вакиллари) буни хоҳламади. У (Фёдор) UFC’га ўтган, Брок Леснар билан жанг қилган бўларди. Мен ақл бовар қилмас таклиф билдирим. Энди бўлган воқеани кўриб, уни қабул қилмаганларидан жуда хурсандман! Вадим, Вадим билади... Улар ўша пайт устимдан кулишганди. Энди ишончим комилки, улар ҳозир кулмаяпти. Вақт машинасига ўтириб, ўтмишга қайтишни, яна ўша хонада бўлишни ва битимни амалга оширишни хоҳлашади. Лекин энди бунинг иложи йўқ, ҳаммаси тамом!
Федор Емеляненконинг ўзи эса қуйидагича фикр билдирган:
— Ҳа, биз оролда учрашганмиз. Қисқа суҳбат бўлди. Бир нарса ваъда қилинган эди, лекин ҳужжатларни олганимизда — уларда бошқа нарса бор эди. Дана эртами-кечми UFC’да жанг қилишимни, у таклиф қилаётган шартномага “ҳа” дейишимни айтганди. Фаолиятим давомида Дананинг менга нисбатан кўплаб салбий фикрларини эшитганман. Агар кимдир сиз ҳақингизда ёмон гап айтса ва кейин сизни биргаликда бирор нарса қилишга таклиф қилса, бунга қандай муносабатда бўлиш керак? Бу ерда гап пулда эмас, балки ўзаро ҳурмат масаласида.
3. Алекс Волкановски қисқа вақт ичида Махачев билан жангни қабул қилди
Ярим енгил вазн тоифасида етакчи чемпион бўлган Волкановски узоқ вақтдан буён енгил вазн тоифасида чемпионликни қўлга киритиш орзусида эди. Бундай имконият унга 2023 йил февраль ойида насиб этди. Энг қийин жангда Ислом Махачев титулни ҳимоя қилди. Кўп ойлар давомида реванш ҳақида миш-мишлар тарқалди. Бу вақт ичида Волкановски ярим енгил вазн тоифасида чемпионликни ҳимоя қилди. Махачев ҳимояни октябрь ойида ўтказиши керак эди, бироқ унинг рақиби Чарльз Оливейра жанг арафасида октагонга чиқмаслиги маълум бўлди. UFC Алексга қисқа билдиришнома билан чиқишни таклиф қилди. Табиийки, Волкановски рози бўлди. Натижа эса: биринчи раундда оғир нокаут.
Шундан сўнг Волкановски яна бир хатога йўл қўйди. Яхшилаб ўзига келиб олиш ўрнига, у иложи борича тезроқ қайтишга қарор қилди. Оғир мағлубиятдан атиги уч ой ўтгач, у ярим енгил вазн тоифасида нокаутга учраган Илья Топурияга қарши чемпионлик унвонини ҳимоя қилиш мақсадида октагонга кўтарилди ва яна бир нокаутга учради. Бир йилдан кўпроқ вақт ўтгач, у Диэго Лопесни мағлуб этиб, камарни қайтариб олди. Аммо қисқа вақт ичида октагонга чиқиш унга камар, мақом ва икки йиллик фаолияти учун қимматга тушди.
2. Генри Сехудо айни кучга тўлган пайтида фаолиятини якунлашга қарор қилди
Сехудо спортда ақл бовар қилмайдиган ютуқларга эришди. Олимпиада олтин медалидан ташқари, у икки вазн тоифасида UFC чемпиони бўлди. Аммо кўпчиликни ҳайрон қолдирган ҳолда, ўта енгил вазн тоифасида чемпионликни ҳимоя қилганидан сўнг, Сехудо фаолиятини якунлаганини эълон қилди. Бу қарорни ҳеч ким тушунмади. Миш-мишларга кўра, янги шартнома бўйича музокаралар олиб борилаётган ва Сехудо шу йўл билан промоушенга босим ўтказмоқчи бўлган. Бироқ Дана Уайт принципиал йўл тутган, натижада Сехудо омадсиз деб топилган. Уч йил ўтгач, Сехудо қайтишга қарор қилди, аммо у энди “чўққи”даги жангчи эмас эди. Кетишдан олдин Сехудо кетма-кет олтита ғалабадан иборат серия қайд этган, кейин эса кетма-кет учта мағлубиятга учраган
1.Тони Фергюсон Жастин Гетжи билан жангни қабул қилмоқда
Тони Фергюсон ушбу рейтингда сўзсиз биринчи ўринни эгаллаб турибди. Воқеа ёдга олинса, 18 апрель куни бўлиб ўтиши керак бўлган UFC 249 мусобақасида Тони Фергюсон ва Ҳабиб Нурмагомедовнинг узоқ кутилган жанги бўлиб ўтиши керак эди. Бироқ коронавирус пандемияси туфайли турнир бир кун аввал бекор қилинганди. Ҳабиб Россиядан учиб кета олмади, шунинг учун UFC унга янги рақиб топишини эълон қилди. Кўп ўтмай, Фергюсон Гетжи билан жанг қилиши маълум бўлди. Турниргача кетма-кет 12 ғалабадан иборат серияни қўлга киритишга улгурган Фергюсон яққол фаворит ҳисобланарди. Бироқ, рақибни алмаштириш билан узоқ давом этган машғулот лагери ва қисқа вақт ичида икки марта вазн йўқотиш ўз таъсирини кўрсатди. Жангда Фергюсон ўзига ўхшамасди. Гетжи уни тик турган ҳолатда йиқитиб, ҳакамни бешинчи раундда зарбани тўхтатишга мажбур қилди. Ўша жангдан кейин Тонида нимадир хато кетди. 8 йил давомида мағлубиятга учрамаган жангчи саккизта мағлубиятдан иборат серия қайд этди. Эҳтимол, ёши ва жанг услуби туфайли Тонининг таназзулга учраши муқаррар эди, бироқ, Гетжига қарши жанг бунга турки бўлгани аниқ.
Изоҳ (0)