Google офисларида катта кўламли норозилик акцияси ўтказилди

1 ноябрь, пайшанба куни Google’нинг бутун дунё бўйлаб офисларида ходимлар катта кўламли норозилик акциясини ўтказиб, корпорацияда жинсий шилқимликка нисбатан муносабатни ўзгартиришни талаб қилди, деб ёзади «Корреспондент.net».

Таъкидланишича, норозиликларда Google’нинг 20 дан ортиқ офисида ишловчи юзлаб ходимлар қатнашмоқда. Ишчилар жабрланувчини жафокорни судга бериш имкониятидан маҳрум қилувчи мажбурий арбитраж қўлланилишига қарши чиқмоқда.

Ҳаммаси Google’нинг юқори даражали менежерларидан бири жинсий шилқимликда айбланганидан кейин ишдан кетиб, 90 миллион доллар ҳажмида тўлов олганидан кейин бошланди.

Android операцион тизими яратувчиси деб аталаётган Энди Рубин айбловларни рад этмоқда.

30 октябрь куни компаниянинг Google X тадқиқот лабораторияси раҳбари Ричард Девал истеъфога чиқди. У, гўёки яқинда ишга кириш учун суҳбатдан ўтган аёлга нисбатан номувофиқ муносабатда бўлган.

Хабар берилишича, жинсий шилқимликлар учун компенсация тўламасдан камида 48 нафар бошқа ходимлар ишдан ҳайдалган.