Олий Мажлис Сенатининг 16-ялпи мажлиси 27 сентябрь куни чақирилади, дея хабар бермоқда Ўзбекистон парламенти юқори палатаси ахборот хизмати.
Сенатнинг ялпи мажлиси кун тартибига бир қатор қонунлар, жумладан, «Давлат божхона хизмати тўғрисида»ги (янги таҳрир), «Хусусий бандлик агентликлари тўғрисида»ги, «Ўзбекистон Республикаси Давлат хавфсизлик хизмати кунини белгилаш тўғрисида»ги қонунлар киритилади.
Сенаторлар шунингдек иқтисодий муносабатлар ва тадбиркорликни ривожлантиришга, юридик ёрдам ва ҳуқуқий хизматлар кўрсатиш тизимини, аҳолини ижтимоий ҳимоя қилишни таъминлаш ва уй-жой коммунал хизматлар кўрсатиш тизимини такомиллаштиришга, жамоат хавфсизлигини таъминлаш ва жиноий жавобгарликни либераллаштиришга, шунингдек атроф-муҳитни муҳофаза қилиш, табиий ресурслардан оқилона фойдаланиш соҳасидаги ҳуқуқбузарликлар учун жавобгарликни кучайтиришга қаратилган айрим қонун ҳужжатларига ўзгартиш ва қўшимчалар киритиш тўғрисидаги қонунларни ҳам кўриб чиқади.
Бундан ташқари, халқаро шартномаларни ратификация қилиш тўғрисидаги қатор қонунлар ҳам кўриб чиқилади ва 2017—2021 йилларда Ўзбекистон аҳолисига ихтисослаштирилган тиббий ёрдам кўрсатишни янада ривожлантириш чора-тадбирлари дастурининг ижроси тўғрисида бош вазир ўринбосарининг ахбороти эшитилади.
Ялпи мажлисда Бухоро вилояти ҳокимининг ҳудудларни ривожлантириш ва халқ депутатлари маҳаллий Кенгашлари фаолияти ҳақидаги ҳисоботи ҳам эшитилиши кутилмоқда.
Сенат аъзолари қишлоқ хўжалигида меҳнатга оид муносабатларни тартибга солиш ҳамда мазкур соҳадаги норасмий бандлик масалалари юзасидан бош вазири ўринбосари — молия вазирига парламент сўрови юбориш билан боғлиқ масалаларни ҳам муҳокама қилади.
Изоҳ (0)