O‘zbekiston Respublikasi mustaqilligining 27 yillik bayrami arafasida xizmat vazifasini o‘tash vaqtida halok bo‘lgan harbiy xizmatchilarning bir guruh oila a’zolari madaniy hordiq chiqarish uchun Xitoyga yo‘l oldi. Sayohatchilarni kuzatish marosimi Qurolli Kuchlari davlat muzeyida bo‘lib o‘tdi. Bu haqda Mudofaa vazirligi matbuot xizmati xabar berdi.
Marosimda Xitoyning O‘zbekistondagi elchisi Szyan Yan, O‘zbekiston mudofaa vazirining tarbiyaviy va mafkuraviy ishlar bo‘yicha o‘rinbosari polkovnik Azizbek Ikramov hamda ommaviy axborot vositalari vakillari ishtirok etdi.
Eslatib o‘tamiz, O‘zbekiston Prezidentining 2018-yil 4-avgustdagi “O‘zbekiston Respublikasi Qurolli Kuchlari harbiy xizmatchilarining ma’naviy-ma’rifiy saviyasini oshirish tizimini tubdan takomillashtirish to‘g‘risida”gi qarori bilan mustaqillik yillarida xizmat vazifalarini bajarish chog‘ida halok bo‘lgan harbiy xizmatchilar xotirasini abadiylashtirish hamda ularning oila a’zolarini ijtimoiy qo‘llab-quvvatlash bo‘yicha qator vazifalar belgilab berilgan edi.
Ushbu qaror ijrosini ta’minlash doirasida O‘zbekiston Respublikasi Qurolli Kuchlarida xizmat burchini o‘tash chog‘ida halok bo‘lgan harbiy xizmatchilarning oila a’zolari 10 kun davomida Xitoyning diqqatga sazovor joylariga sayohat qiladilar.
“O‘g‘lim Shuhratbek Sobirov 2000-yili yurtimizning janubiy hududlariga suqilib kirgan bir guruh terrorchilar bilan bo‘lgan to‘qnashuvda qahramonlarcha halok bo‘ldi. O‘g‘lim 25 yoshida O‘zbekiston xalqini himoya qilib, barchaga o‘rnak bo‘ldi. Men u bilan umrbod faxrlanaman. O‘zbekiston Prezidentining e’tiborlari sabab, bugun biz Xitoy davlatiga sayohatga ketyapmiz. Bunday rag‘batdan boshimiz ko‘kka yetdi...”, – deydi Andijon viloyatidan kelgan Sotqinboy Sobirov.
Izoh (0)