«Ўзбекнефтгаз» АЖнинг «Kun.uz»га хабар беришича, Ўзбекистон бош вазирининг ўринбосари, «Ўзбекнефтегаз» АЖ бошқаруви раиси Алишер Султоновнинг аҳволи жиддий хавфда эмас, у ҳозирда шифокорлар назорати остида.
Тиббиёт ходимларининг таъкидлашича, А. Султоновда жиддий жароҳатлар йўқ, унинг ҳолати яхшиланмоқда ва у тез орада ўз вазифаларини бажаришга яна киришади.
Ўзбекистон Бош прокуратурасидан хабар беришларича, йўл-транспорт ҳодисаси Тошкент вилоятида содир бўлган.
Аввалроқ 20 август куни Ўзбекистон ҳукумати раҳбарияти кортежи Тошкент вилояти Бекобод тумани ҳудудида йўл-транспорт ҳодисасига учрагани хабар қилинганди.
Аниқлик киритилишича, Бекобод туманига кетаётган кортеж Деҳқонобод МФЙ яқинида аварияга учраган. Ушбу ЙТҲ оқибатида Ўзбекистон бош вазири Абдулла Арипов ва унинг ўринбосари, «Ўзбекнефтгаз» компанияси бошқаруви раиси Алишер Султонов жароҳат олган.
Қайд этилишича, қарама-қарши йўналишда ҳаракатланган Damas русумли автомобиль ҳайдовчиси бошқарувни йўқотиб, кортежга урилиши оқибатида йўл-транспорт ҳодисаси юзага келган.
Изоҳ (0)