Скриншот ҳужжат сифатида: Ўзбекистонда рақамли маҳсулотлар бўйича битимларни расмийлаштириш тартиби белгиланди

Ўзбекистонда рақамли маҳсулотлар бўйича битимлар ҳисобини юритиш тартиби белгиланди, деб ёзади Spot Вазирлар Маҳкамаси қарорига таяниб.

Биринчи марта рақамли маҳсулотларга аниқ тавсиф берилди — булар интеллектуал мулк объектларининг электрон нусхалари (рақамли товарлар), шунингдек, электрон ахборот муҳитида моддий натижага эга бўлмаган муайян ҳаракатлар ёки муайян фаолиятни амалга ошириш, шу жумладан, «булутли технологиялар» хизматини харид қилиш ва унга обуна бўлиш хизматлари (рақамли хизматлар).

Рақамли маҳсулотлар импорти — рақамли маҳсулотлар учун мутлақ ҳуқуқлар ёки рақамли маҳсулотлардан фойдаланиш ҳуқуқини бериш.

Моддий ташувчиларда тарқатиладиган рақамли маҳсулотлар бўйича битимлар бошқа товарлар билан тузиладиган битимларга ўхшаш тарзда ҳужжат билан тасдиқланади.

Агар уларнинг моддий ташувчилари бўлмаса, улар электрон чеклар, инвойс нусхалари, транзакциялар скриншотлари кабилар билан тасдиқланади.

Тегишли равишда, импорт ва экспорт чоғида моддий ташувчиларда тарқатиладиган маҳсулотлар божхона расмийлаштирувидан ўтиши керак, агар улар интернет орқали етказилса, расмийлаштирилмайди.

Шунингдек, рақамли маҳсулотларнинг бухгалтерия ҳисобига ҳам аниқлик киритилган. Бундай ишлар ижрочида бажарилган ишларни амалга оширишдан олинган даромад сифатида, буюртмачида эса — номоддий активларни яратиш билан боғлиқ харажатлар сифатида расмийлаштирилади.