26 минг сўмдан гўшт, 200 сўмдан тухум. Бу нархлар Ўзбекистондаги бозорларда борми?
Чиндан ҳам ушбу маҳсулотлар шу нархларда маҳаллий бозорларда сотилмоқда. Ўзбекистон Истеъмолчилар ҳуқуқларини ҳимоя қилиш жамиятлари федерацияси матбуот хизматига кўра, ташкилот онлайн тарзда мамлакат бозорларида сотилаётган маҳсулотларни таҳлил қилмоқда. Шу боис мазкур маълумотлар ишончли манбалар асосида тузилган дейиш мумкин.
Айни вақтда пишиқчилик мавсуми бўлгани учун биринчи галда шакарнинг нархи билан қизиқилди. Унинг бир килограмми 4 минг 200 сўмдан 6 минг 500 сўмгача бўлиб, Нукус шаҳар марказий деҳқон бозорида 5000-5500 сўм атрофида, «Сиёб» бозорида 6 минг сўмга сотилмоқда. Қарши шаҳридаги «Ерқўрғон» деҳқон бозорида 4200-4500 сўмга баҳоланмоқда.
Хўжалик совуни нархлари минг сўмдан уч минг сўмгача белгиланган. Мисол учун, Нукус шаҳар марказий деҳқон бозори, Самарқанд шаҳридаги «Сиёб» бозори, пойтахтдаги Миробод деҳқон бозорларида нарх энг баланд бўлса, Сардоба (Сирдарё), (Тошкент шаҳри) Юнусобод деҳқон бозорларида хўжалик совунини минг сўмга ҳам харид қилиш мумкин.
Бозорларда бир дона тухумнинг нархи 650-200 сўм тарзида шакллантирилган бўлиб, унинг энг қиммати Юнусобод ва Миробод (Тошкент шаҳри) деҳқон бозорлари ҳиссасига тўғри келади. Навоий шаҳар деҳқон бозорида тухумни 200 сўмга ҳам топасиз.
Мол гўштининг нархи кун сайин ўзгариб бормоқда. Шу кунларда эса 26 минг сўмдан 42 минг сўмгача баҳоланмоқда. Миробод (Тошкент шаҳри) деҳқон бозорида энг баланд нархлар кузатилган бўлса, Нукус шаҳар марказий деҳқон бозорида 26 минг сўмга сотилмоқда.
Картошканинг ўртача нархи 1000-1500 сўм бўлиб, унинг энг қиммати Нукус шаҳар марказий деҳқон бозорида икки минг сўмни ташкил этган ҳолда, Андижондаги Янги шаҳар бозорида 750 сўмга сотиилмоқда.
Пиёзнинг бозорлардаги ўртача баҳоси 800-1500 сўм. Уни 400 сўмга олмоқчи бўлсангиз, «Фарҳод» (Тошкент шаҳри) деҳқон бозоридан топасиз. Қорақалпоғистонда эса бир килограмми икки минг сўмга баҳоланмоқда.
Иссиқ кунларда помидор ва бодринг энг харидоргир бўлиб, уларнинг ўртача баҳоси турлича. Мисол учун, помидорнинг энг арзони Андижонда бўлиб, 500 сўм, энг қиммати эса Самарқандда сотилмоқда. Бозорлар кесимида ўртача нарх минг сўмдан икки минг сўмгача эканлигини кузатиш мумкин.
Бодринг нисбатан қимматроқ бўлиб, унинг ўртача нархи 2-3 минг. Термез шаҳар марказий деҳқон бозорида минг сўмга ҳам олсангиз бўлади. Энг баланд баҳони Бухоро шаҳар марказий деҳқон бозорида кузатиш мумкин.
