«Катта еттилик» мамлакатлари етакчиларининг Канадада бўлиб ўтган учрашуви жанжал билан якун топди, деб ёзмоқда «MK.ru».
Учрашувда АҚШ ва ҳамкор мамлакатлар ўртасида тижорат божларини жорий қилиш масаласи муҳокама қилинган. Европа мамлакатлари раҳбарларининг ҳеч қайсиси учрашувда Трампга ён босмаган. Натижада АҚШнинг энг яқин ҳамкори — Канада бош вазири унга қарши чиққанида Трампнинг асаблари дош беролмаган.
Трамп Канада бош вазири Жастин Трюдони қарорлари ва ишларида изчиллик йўқлигида айблаган. АҚШ президентининг айтишича, Канада бош вазири мажлис давомида индамай ўтирган, бироқ Трамп бошқа тарафга чалғиши билан АҚШ жорий қилаётган божлар ҳақоратли экани ва ўзидан фойдаланишга йўл қўймаслигини айтган.
Трамп Канада бош вазирининг бу ишини танқид қилиб, божларни Канаданинг АҚШ сут маҳсулотларига нисбатан 270% солиқ ўрнатганига жавобан жорий қилганини айтган.
Натижада Трамп ўзининг вакилларига G7 саммитининг якуний коммюникесини имзоламаслик ҳақида кўрсатма берган.
Германия канцлери Ангела Меркелнинг шахсий фотографи саммитдаги муҳокамалар жараёнини суратга туширган. Суратлардан бирида Ангела Меркель столга суянганча олдингга интилиб турибди. Нариги тарафда Трамп норози қиёфада пастдан тепага қараб турган. Саммитнинг қолган қатнашчилари Меркель тарафда жойлашган, уларнинг ҳам қиёфасида норозиликни кўриш мумкин. Трампнинг олдида эса ёрдамчисидан бошқа ҳеч ким йўқ.
Сурат Ангела Меркелнинг Instagram’даги расмий саҳифасида эълон қилинган. Суратга Меркель «G7 саммитининг иккинчи куни, 2 та ишчи сессия орасидаги кутилмаган музокаралар», — дея изоҳ қолдирган. Яна бир сурат Twitter’даги Red T Raccoon саҳифасида эълон қилинган. Суратда Меркель Трамп ва бутун жамоа устидан назорат ўрнатган киши қиёфасида экс этган.
Суратлар мемларнинг яратилишига асос бўлган. Ижтимоий тармоқлар фойдаланувчилари умумий хулосага келган: Трамп юқоридаги вазиятда катталар тарбиялашга уринаётган инжиқ болакайга ўхшаб қолган.
Эслатиб ўтамиз, Трамп G7 етакчилари саммити коммюникесини имзолашдан бош тортган.
Изоҳ (0)