Tramp ijtimoiy tarmoqlardagi suratlarda injiq bolakay qiyofasida aks ettirildi

“Katta yettilik” mamlakatlari yetakchilarining Kanadada bo‘lib o‘tgan uchrashuvi janjal bilan yakun topdi, deb yozmoqda “MK.ru”.

Uchrashuvda AQSh va hamkor mamlakatlar o‘rtasida tijorat bojlarini joriy qilish masalasi muhokama qilingan. Yevropa mamlakatlari rahbarlarining hech qaysisi uchrashuvda Trampga yon bosmagan. Natijada AQShning eng yaqin hamkori — Kanada bosh vaziri unga qarshi chiqqanida Trampning asablari dosh berolmagan.

Tramp Kanada bosh vaziri Jastin Tryudoni qarorlari va ishlarida izchillik yo‘qligida ayblagan. AQSh prezidentining aytishicha, Kanada bosh vaziri majlis davomida indamay o‘tirgan, biroq Tramp boshqa tarafga chalg‘ishi bilan AQSh joriy qilayotgan bojlar haqoratli ekani va o‘zidan foydalanishga yo‘l qo‘ymasligini aytgan.

Tramp Kanada bosh vazirining bu ishini tanqid qilib, bojlarni Kanadaning AQSh sut mahsulotlariga nisbatan 270% soliq o‘rnatganiga javoban joriy qilganini aytgan.

Natijada Tramp o‘zining vakillariga G7 sammitining yakuniy kommyunikesini imzolamaslik haqida ko‘rsatma bergan.

Germaniya kansleri Angela Merkelning shaxsiy fotografi sammitdagi muhokamalar jarayonini suratga tushirgan. Suratlardan birida Angela Merkel stolga suyangancha oldingga intilib turibdi. Narigi tarafda Tramp norozi qiyofada pastdan tepaga qarab turgan. Sammitning qolgan qatnashchilari Merkel tarafda joylashgan, ularning ham qiyofasida norozilikni ko‘rish mumkin. Trampning oldida esa yordamchisidan boshqa hech kim yo‘q.

Surat Angela Merkelning Instagram’dagi rasmiy sahifasida e’lon qilingan. Suratga Merkel “G7 sammitining ikkinchi kuni, 2 ta ishchi sessiya orasidagi kutilmagan muzokaralar”, — deya izoh qoldirgan. Yana bir surat Twitter’dagi Red T Racoon sahifasida e’lon qilingan. Suratda Merkel Tramp va butun jamoa ustidan nazorat o‘rnatgan kishi qiyofasida eks etgan.

Suratlar memlarning yaratilishiga asos bo‘lgan. Ijtimoiy tarmoqlar foydalanuvchilari umumiy xulosaga kelgan: Tramp yuqoridagi vaziyatda kattalar tarbiyalashga urinayotgan injiq bolakayga o‘xshab qolgan.

Eslatib o‘tamiz, Tramp G7 yetakchilari sammiti kommyunikesini imzolashdan bosh tortgan.